Shillong, Naiwieng 20 : U Myntri Rangbah ka Jylla Conrad K Sangma ha ka sngi Balang, ula plie paidbah ia ka Operation Theatre Complex ha Sohra Community Health Centre, Saitsohpen bad buh ruh ia u maw nongrim ka Phase-II jong ka Iew Sohra.
Kine la sakhi lang ia kane ki kynthup ia u Myntri ka Koit ka Khiah Bah Wailadmiki Shylla, MLA ka Shella Bah Balajied Kupar Synrem, MLA ka Sohraa Bah Gavin M Mylliem bad kiwei kiwei.
Haba kren ha ka jingialang, u Myntri Rangbah ula ong ba ka jinglait lynti jong ka Sohra CHC ka dei kaba ai mynsiem shisha bad ka nuksa ia kiwei pat ki jaka sumar ha Jylla. “ Ka histori jong kane ka Sohra CHC na kaei kaba ka long haduh kaei kaba long mynta, ka dei shisha ia kaban ai jingiaroh, ka jingkylla bad jingkiew jong kane ka CHC ka dei ka nuksa ia kaei kaba ngi lah ban leh haba ngi aiti bad met bad mynsiem ia kaei kaba ngi leh, kaba long da ka jingthmu” ula ong.
U Myntri Rangbah ula ong ruh ba ka Meghalaya kala iohi ia ka jinghiar sted bha ka jingiap ki longkmie ba kha khun namar ka jingpynleit jingmut bad ki jingpyrshang ban leh eiei halor ki jingeh kiba dei hok, kiba lam sha ka jingjur ka jingiap ki longkmie ba kha khun bad kumno ban leh eiei iaki.
“Kane ka dei ka jingjop kaba khraw kaba ngi la lah ban pynduna ia ka MMR ha ka Jylla jong ngi bbad hateng hateng kam da dei eh ka jingdonkam ban kynshew pisa bun hynrei ka jingkynshew kaba rit bad ki sienjam kiba kongsan kiba lah ban wanrah ia ka jingkylla” ula ong.
Ula pynbna ruh ia ki rai kiba khraw bala shim da ka Kynhun Myntri ban sdang ia ka Outcome Based Budgeting ne ka jing mang tyngka kaba la pynshong nongrim na ki jingseisoh. “Mynta ngin ai sha phi ia ka song pisa kat kum ki jingdonkam jong phi bad kaban iaid kat kum ki jinglah treikam jong phi” ula ong.
U Myntri Rangbah ula pynpaw ruh ia ka jingkmen ban buh ia u maw nongrim na ka bynta ban pyntrei ia ka bynta kaba ar jong ka Iew Sohra. “Kane ka dei ka jingkular jong ngi ha kaban pynthikna ba kan don ka roi ka par ba mar katjuh ha baroh kawei ka Jylla” ula ong haba bynrap ba ka Sohra, kaba dei ka jaka wan kai ba khring bha ia ki nongjngoh pyrthei ka donkam ia shibun ki jingtei kiba donkam.
“Kane ka Iew kan ai ruh ia ka lad na ka bynta ki samla ba kin sdang iala ki kam” haba kyntu ia ki samla ka Sohra ba kin shim kabu ia ki skhim pher bapher jong ka Sorkar.
Nalor kane, u Myntri Rangbah ula pyntip ba ia ka surok na Umtyngar sha Mawsmai la shimkhia ban pyntrei da ka World Bank. “Kane ka surok ruh ka dei ka jingkynshew kaba khraw da ka jingthmu ban kyntiew ia ki kam jngohkai ha ka thain” ula ong.
Ka OT Complex kan nang pynjanai ia ka jingshakri ha ki jingleh surgery ba kyrkieh bad ba donkam hapoh ka thain, ka ban pynduna ia ka jingdonkam ban hap wan kiew shaduh sha Shillong bad kiwei ki jaka, ka ban pynduna ruh ia ka jinglut jingsep jong ki nongpang bad ki bahaiing hasem jong ki.
