Shillong, Risaw 16: U Myntri Rangbah ka jylla Conrad K. Sangma, ha ka sngi Palei, u la plie paidbah ia ka madan Synthetic Football Turf ha Madan Centre, Kharbuli, Nongkrem kaba dei ruh ka madan artificial turf ba nyngkong eh hapoh ka shnong Nongkrem Pyllun hi baroh kawei.
Ia kane ka projek la pyntreikam lyngba ka skhim Khelo India da ka State Sports Council Meghalaya, Shillong, bad la mynjur ha u snem 2020–21. Ka jaka ka don ïa ka madan ïalehkai phutbol ba la shna da ki phlang plastic, ki jaka pyntuid um kiba mynta, ka jingker ba la pyndait da ki sainar, bad ka jaka shong ki VIP bad ki kamra khreh jong ki nongïalehkai.
Ha kane ka sngi la ia don lang ruh u Bah Wailadmiki Shylla, uba dei u Myntri ka tnad Sports & Youth Affairs, u MLA barim ka Nongkrem Bah Lambor Malngiang, u Paiem Dr. Balajied Sing Syiem, Syiem ka Hima Khyrim bad kiwei kiwei de ki riew rangbah.
Haba ai jingkren u Myntri Rangbah u la pynpaw ia ka jingkmen halor ka jinglah ban pyndep ia kane ka madan bad u la pynpaw ruh ia ka jingshimkhia jong ka sorkar ban kyntiew ia ka sap ialehkai ki samla ha ka jylla Meghalaya. U la kdew ba ka jylla ka don ïa ka jingbun briew kaba bun ki samla bad u la ban jur ïa ka jingdonkam ban bei tyngka ha ki lad ki lynti kiban pynroi ïa ki samla, kynthup ïa ka pule puthi, ki jingtei, bad ki jingïalehkai.
U la ban jur ba ki jingïalehkai ki hikai ïa ka jinglong discipline, ka jingtrei shitom ha ka kam ïalehkai, bad u la kdew ba ha kine ki hynniew snem shiteng ba la dep, palat 70% na ki jingtei na ka bynta ki kam ïalehkai ba mynta jong ka jylla la nang ban pynroi shuh shuh.
U Myntri Rangbah ka Jylla u la pynpaw ruh ïa ki jingpyrshang ban dang ïaid shakhmat ban pynïar ïa ki kam ïalehkai ba shapoh, kynthup ïa ki leauge bad ki jingïalehkai ha ka kyrdan jong ki block, ki ban pynshlur ïa ki samla ban ïashim bynta, ban pynïalehkai met, bad ban ïashim bynta ha ki kam kiba bha. U la kyntu ia ki samla trai shnong bad ruh ia ki shnong ba marjan ban pyndonkam hok ia kane ka jaka, ban sumar ia ka da ka jingkitkhlieh, bad ban shim ia ki lad ki lynti ban kyntiew ia ka sap ialehkai jong ki.
Na ka liang u Bah Wailadmiki Shylla u la ïaroh ïa ka jingïalam u Myntri Rangbah ka Jylla bad ka jingshim bynta jong u ha ki kam pynroi. U la pynpaw ia ki jingthmu jong ka sorkar kiba kyrshan ia ki nongialehkai, ki samla nongseng kam seng jam, ki nongtem, bad ki samla ha kylleng ka Meghalaya, kynthup ia ka jinghikai, ka jingkyrshan pisa, bad ki lad ioh kam ioh jam.
U Bah Lambor Malniang uba dei u MLA barim ka Nongkrem u la ai khublei ia u Conrad K Sangma uba dei u Myntri Rangbah u la mang pisa na ka bynta kane ka project ha ka por ba ka pyrthei baroh kawei ka shem jingeh na ka jingdon ka khlam COVID 19.
Shuh shuh u la pyntip ba naduh ba la buh ia u maw nongrim ban shna ia kane ka madn ha u snem 2021, mynta ynda la dep kane ka madan kala kylla shi sha ia ka dur jong ka bad kane kala long shisha ka jingkem ia ki paidbah jong ka Nongkrem hi baroh kawei bad kumjuh ruh iaka Sport Club.
Na ka liang u Bah Lambor u la ai ruh ka jingkyrshan ia ka jingkyrpad jong ka Nongkrem Dorbar Pyllun ba ka sorkar kadei ban pynioh sa kawei ka madan kaba kum kane, da kaba u la kyntu ia u Conrad bad ruh ia u Bah Wailadmiki ba kin ialeh shitom ban pynioh sa kawei ka madan ha ka shnong Smit kaba dei ka Nongbah ne ka headquater jong ka Hima Khyrim.
Shuh shuh u Bah Lambor Malniang u la pyntip ba ka jinglut jingsep baroh ba shna ia kane ka Synthetic Football Turf ha Madan Centre, Kharbuli, Nongkrem ka long T. 7 klur 34 lak tyngka.
