SHILLONG, Risaw 16: U myntri rangbah ka jylla u Conrad K Sangma haka 15 tarik mynta u bnai ula plie iaka jingialehkai Basketball ha Lawsohtun haka jingdon lang u myntri ka tnat CRD Block u bah Hamletson Dohling bad ki nongialam shnong bad ki nongialam ka National People’s Youth Front (NPYF).
Ia kane ka Basketball tournament naka bynta ki samla kynthei bad shynrang la pynlong daka National People’s Youth Front (NPYF) bad ka kynhun ba jop kan rah iaka song pisa ba T. 50 hajar bad ka ba wang ba ar kan ioh T. 30 hajar.
Haba kren ba kane ka sngi u Conrad ula ong ba ka jylla Meghalaya ka kham bun kidei ki samla bad dei namar kane donkam ban wanrah ki policy lane ki projek kiba iahap bad ki ban kyntiew iaki samla ka jylla.
“Ka jingialehkai ka long ka ba donkam bha haka imlamg sahlang khamtam iaki samla namar ki jingialehkai ym tang ka kyntiew iaka koit ka khiah hynrei ka hikai ruh kumno ban long ki briew ban trei shitom naka bynta ban ioh kheit ia u soh ka jingjop” la ong u Conrad.
U Conrad ula ong ba ki jingialehkai nalor ba ki hikai ban long ki briew kiba im hok, ka hikai ruh ban long kiba pyntbit ialade man ka sngi naka bynta ban long shisha kiba adkar haka imlang sah lang.
“Haka jingim ka don ka jingjop bad jingrem hynrei kum ki nongialehkai donkam ban sngewthuh bad dei ban pdiang ia kano kano ka jingmih haba ialehkai namar ka jingjop bad ka jingrem kan hikai beit iaki nongialehkai ban nang trei shitom shuh shuh” la ong u Conrad.
