Shillong Risaw 16: Ka Nongthymmai Sports & Cultural Club kala ioh ban bteng biang ia ka jingrakhe ia ka Platinum Jubilee da kaba pynlong iaka jingialehkai phutbol Inter Shnong ha ka 15 tarik u bnai Risaw 2022 ha Madan Nongthymmai, Shillong hadien ba lah sangeh kumba 2 snem eiei ki jingialehkai na ka daw ka jingsaphriang ka khlam COVID-19.
Ha kane ka sngi sdang, la pynlong ia ka phutbol jong ki Kynthei hapdeng ka Umpling pyrshah ia ka Nongkhyriem ha kaba Umpling kala pynliem noh ia ka Nongkhyriem da 4 kol la nod.
Ka Daphishisha Marthong kala ioh thep ar kol, ka Quinie Nongrum bad Daisy Sohtun kila thep mar shi kol.
Ha ka liang ki shynrang, ka jingiakhun kala long hapdeng ka Nongkhyriem-A pyrshah ia ka Nongkhyriem-C bad ka Nongkhyriem-C kala pynliem da 2 kol 1 ia ka Nongkhyriem-A.
Ia kine ki kol na ka Nongkhyriem-C la thep da u Rodrick Kharmujai bad Banshan Ramsiej katba u Ban Syiemlieh ula thep kol na ka bynta ka Nongkhyriem-A.
Hashwa ban sdang ia katei ka jingrakhe Platinum Jubilee, ha ka por mynstep ka Nongthymmai Sports & Cultural Club ryngkat ka jingsnohkti lang ka Nehru Yuva Kendra, Shillong kila pynlong iaka jingpynkhuid ia ka madan ialehkai, Indoor Stadium bad iaki lynti ki syngkien kum ka dak jongka jingiashim bynta lang ha ka Clean India 2.0.
Ha kane jingpynkhuid, la wan iashimbynta da ki khynnah ka Nongthymmai Football Coaching Centre, ki nongialehkai Badminton, Karate, ki dkhot ka Gym bad Carrom Board bad ki dkhot ka Club.
Ka Dr (Mrs) Banida Shisha Kharkongor kum ka Kongsan kala plie ia katei ka jingrake ha ryngkat ka jingiadonlang u Bah R.V Dkhar, Adviser jongka Synjuk ki Nongsynshar Shnong Nongthymmai Pyllun uba long ruh u Rangbah Shnong, Dorbar Shnong Lumiablot, Bah E Rynjah Assistant Rangbah Shnong, Dorbar Shnong Lawjynriew, Bah B. Khyriem, Rangbah Shnong, Dorbar Shnong Lawjynriew uba long ruh u President ka Club, ki nongkitkam shnong na ka Dorbar Shnong Umpling bad kiwei kiwei. Kane ka long katkum ka kyrwoh na u Bah JS Cajee, General Secretary Nongthymmai Sports & Cultural Club.
