Shillong, Nailar 23: U Myntri Rangbah ka jylla Conrad K Sangma hynne ka sngi Balang, ula plie paidbah iaki kor MRI hapoh ka Nazareth Hospital Shillong.
Haba kren ha kane ka sngi u Conrad ula iaroh bad ula ai khublei ia baroh ki nongtrei ka Nazareth Hospital kiba shakri iaki paidbah haka liang ki lad aijingsumar khamtam iaki paidbah kiba wan na ki thain nongkyndong bad na ki longïiing ba duk.
“Ka jingshakri ka Nazareth Hospital ka long kaba bha tam bad nga kwah ban pynpaw ka jingai khublei ba kyrpang ia baroh naduh ki doctor haduh ki nongrtrei jong ka Nazareth Hospital bad nga kwah ruh ban pynpaw ba ka jingplie paidbah ia kane ka kor MRI kan nang pynkhlain bad pynjanai shuh shuh iaka lad jingsumar namar ka jingdon jong ka MRI ha Shillong kan pynlong iaki paidbah ban nym pynlut por lane pisa ban leit sha kiwei ki jaka ban leh MRI” ong u Conrad.
U Conrad ula ong ba ka kam ba iadei bad ka koit ka khiah bad ka jingshakri ia ka imlang sahlang hapoh ka jylla ka long kawei na ki jingtynjuh kaba khraw eh ia ka Jylla.
“Ka koit ka khiah kadei kaba bun jingtynjuh bha kaba ngi hap ban leh eiei namar kiba bun ki jingeh kiba don hynrei ha ki san snem bala depngi lah sdang ban khmih ha baroh ki liang bad wanrah ia ki sienjam kaba ngin lah ban pynbha ia ki lad ai jingsumar” ula ong.
U Conrad ula iathuh ba ka sorkar kala shim daki sienjam ba tyngeh ban nang pynkhlain shuh shuh iaki lad jingsumar hapoh ka jylla naka bynta ban pynthikna ba ki paidbah ki im haka jingim kaba koit ba khiah.
“Ngi ieng skhm ban buddien bad ban shim ki sienjam kiba bha tam naka bynta ban pynthikna ba ki briew ki im haka met kaba koit ba khiah naduh ka sngi ba kha haduh da la heh la san namar ka long kaba donkam ban buddien iaka koit ka khiah jong ki khunlung ban pynthikna ba ki ioh iaka met kaba koit haduh da ki la poi haka rta kaba heh” ula ong.
Iaka kor MRI la bei tyngka daka sorkar lyngba ka skhim CMDRF haduh T.25 lak bad naka liang u Myntri Rangbah ka jylla ula kular ruh ban iarap biang sa T.25 lak.
“Ka jingdon jong ka MRI hapoh ka Nazareth Hospital kan wanrah ka jingmyntoi iaki paidbah ka jylla khamtam kito kiba wan na ki thain nongkyndong bad na ki longing kiba duk bad dei namar kane nga kular ban iarap sa T.25 lak ia kane ka Hospital khnang ba kane ka Hospital kan nang lah shuh shuh ban shakri iaki paidbah haka liang ki lad jingsumar” ula ong.
Pule ruh: Shong bishar ka CWE ia ki kam thombor ia ki Kynthei bad Khynnah ha EJH bad WJH
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
