Shillong, Rymphang 17: U Myntri Rangbah ka Jylla u Conrad K Sangma hynne ka sngi Saitjain ula plie paidbah ia ka Iew bad ka jaka ieng kali ha Nazing Bazaar, Tura, West Garo Hills.
Hadien kane, u Conrad ula leit ruh ban jurip iaka Nazing Bazaar ha ka jingsynran lang ka MP na Tura ka Agatha K Sangma, u Bah E Kharmalki uba long u IAS Director ka tnad Urban Affairs, ki dkhot ka Village Council lem bad kiwei kiwei.
Ka thong jong ka Nazing Bazaar kadei ban kyntiew iaki Iew ki hat hapoh ka thain Tura ban pynlong katkum ki juk ba mynta naka bynta ka jingmyntoi ki paidbah ka thain khamtam ki paidbah kiba wan Iew.
Haba kren ha kane ka sngi, u Conrad ula ban jur haba iadei bad ka jinglong kongsan ka Nazing Bazaar Project da kaba ong “Nalor ka Nazing Bazar Project, ka Sorkar Jylla kala sdang ban kyntiew iaki roi ka par hapoh ka nongbah Tura. Ngi sdang ban tei iaka Integrated Secretariat Complex naka bynta ka jingmyntoi ki paidbah”.
U Conrad ula iathuh ba nalor ka Integrated Secretariat Complex ka Sorkar kala mang T.120 klur bad ha kane ka Complex ki don lut ki tnad treikam Sorkar kynthup ka CM Office, Cabinet Office, Conference Room bad kiwei kiwei ki ophis ba donkam.
Ula pyntip ba ka Sorkar kala mang kumba T.120-T.130 klur na ka bynta ka IT Park ha kaba ka jingpyntrei iaka Phase 1 kala jan dep hashuwa ban sdang iaka Phase 2 ka ban pyndep Nailur ne Risaw.
Ha kane ka sngi, la pyni paidbah ruh lyngba ka Video iaka jingdon jingem ka Nazing Bazaar Project naka bynta ban tip paidbah, kiei ki jingdonkam kiba don ha kane ka Project ki ban myntoi ia ka jingdonkam jong baroh.
Na ka liang ka MP ka Tura ka Agatha K Sangma kala ai jingiaroh iaka Sorkar Jylla da ka ba ong “Nga dap daka jingkmen ban iohi iaki kam ba pyntrei ban pynkylla dur ia ka Nazing bazaar. Watla ki don ki jyrwit jyrwat hynrei kane ka Complex kan sa kylla ka Iew kaba itynand bad ka ban ai jingmyntoi ia baroh ki nong shong shnong”.
Ka jingpyntrei ia ka Nazing Bazaar Project kan long kum shi bynta ban pynkylla dur iaka sor Tura bad haka juh ka por ban pynkylla dur iaki jingtei naka bynta ban kyntiew iaka roi ka par bad iaka ka kot ki paidbah.
