Shillong, Nohprah 03 : U Myntri Rangbah ka Jylla Conrad K Sangma hynne ka sngi saitjain, ula plie ia ka hospital ba 100 jingthiah ban sumar ia ki longkmie ba armet bad ki Khunlung khynnah ha Panaliar, Jowai, West Jaintia Hills.
Inaugurated the 100 bedded Maternal and Child Health Hospital at Jowai. This addition will improve the provision of healthcare services that is accessible to the people of Jowai and nearby areas@mansukhmandviya pic.twitter.com/QTuhR9mumg
— Conrad Sangma (@SangmaConrad) December 3, 2022
Haba pynpaw ba kawei na ki mat treikam ba hakhmat eh ka Sorkar ka long ban ai ia ki lad jingsumar kiba janai sha u paidbah, u Myntri Rangbah ula ong ba ha kine ki arsnem bala leit ka khlam Covid kala pyni lut ia baroh ki jingduna ha ki jaka ai jingsumar ka Jylla.
Ula bynrap ba ka Sorkar namar kane ka daw, kala trei shitom bha ban pynbiang ia ki jingdonkam bad pynkhlain ia ki jaka ai jingusar ha ka Jylla.
“Ha ka por ba wan lyngshop ka Khlam, ngi la iohi ia ki jingtuh kibym lah niew hakhmat jong ngi khamtam haba phah sha ki jingtei jong ki jaka sumar. Ka dei ha kane ka por ba ngi iohi ba ngi hap ban pynshew ha kiba bun ki bynta ban ha baroh ki jingdonkam jong ki jaka sumar. Kine ki jingtynjuh kila long ruh ki kabu ia ngi ban pynjanai iaki lad ai jingsumar kat kaba ngi lah” ula ong.
Haba pyntip ia ki paidbah halor kiba bun ki sienjam bala shim da ka Sorkar ha ka jingpynjanai ia ka koit ka khiah, u Conrad ula pyntip ba ka Sorkar kala shna pynbha bad pynbiang ia ka jingdonkam jong palat 80 tylli ki jaka sumar tang ha ka shisnem bala leit noh bad kala lahban pynbiang ia ki jaka sumar ban don haduh 1000 ki jingthiah ban ai jingsumar ia ki paidbah ka Jylla.
Nalor kane, ula pyntip ba kumba 200 tylli ki jaka sumar la lah ban pyndait da ki ring bording n aka sngi bad kiba biang ka bording haba bynrap b aka Sorkar kan sa pynlut palat ia ka T.250 klur ban pynkhlain ia ki jaka ai jingsumar ha ka Jylla.
“Ia mynta, ngi la mang haduh T.150 klur ban tei ia ki 300 tylli ki Sub Centre ha ka Jylla, T. 12.05 klur ban tei ia ki 10 tylli ki Integrated Public Health Laboratories (IPHL) bad 2 tylli ki Critical Cae Block ha ka Jylla kiba ka jinglut jingsep kan kot T. 47.5 klur nalor ki 100 jingthiah ba don ia ki tiar ka juk ka mynta bad ki kor surgery” ula pyntip.
U Myntri Rangbah ula ong ruh ba ka Meghalaya ka dei ka Jylla kaba saw kaba pynlut bha ha ka GDP sha ki kam ka koit ka khiah hapoh ka Ri.
Ula pyntip ruh ha kane ka jingialang ba ka Jylla kala warran ia ka Recruitment Board ban weng ia ki jingeh haba iadei bad ka jingthungkam ia ki doktor bad ki specialist haka Jylla.
