Plie u CM ia ka 5 Star Hotel hadien 37 snem ka jingsah khongreng

By
Ka Shlem
-
0
22

Shillong, Risaw 14: U Myntri Rangbah ka jylla Conrad K Sangma hynne ka sngi thohdieng, ula plie paidbah bad aiti iaka 5 Star Hotel kaba nyngkong eh haka jylla bala tip kum ka Taj Vivanta, kaba don ha Khyndailad, Shillong.

Kane ka Hotel ka dei kaba la sdang ban pyntrei naduh u snem 1985 da ka Meghalaya Tourism Development Corporation (MTDC) ia kaba ai kyrteng ka Hotel Crowborough.
U Myntri Rangbah ka Jylla ula aiti ia u shabi jong kane ka Hotel sha ka Deepshikha Rao kaba dei ka Executive Vice President jong ka Indian Hotel Company Limited (IHCL) kaba mihkhmat ia ki kynhun ban pyniaid ia kane ka 5 Star Hotel.

Ha kane ka jingplie ia ka Hotel la iadonlang u Myntri ka tnad jngohkai u Bah Sniawbhalang Dhar, u Chairman jongka Meghalaya Tourism Development Corporation (MTDC) u Saleng Sangma, u Chief Secretary ka jylla u Bah DP Wahlang, ki Chief Secretary barim ka jylla, ki heh ophisar sorkar, ki trai jong ki Hotel bapher bad kiwei kiwei.

U Conrad ula ong, ka jingplie ia kane ka Hotel ka long kaei kaei kaban sah jingkynmaw iaka jylla bad kan pynsaphriang ruh iaka khubor jong ka jingdon jingkyrmen ba ym dei ban kynran dien haba mad ia kino kino ki jingtynjuh.

U la ong, naduh ka sngi ba ula shimti ban pyniaid iaka sorkar, ula phaikhmat bha sha ki projek bad ki kam kiba la sahteng la slem bah ia kaba ki paidbah kila khmih lynti ba yn ym lah ban leh eiei satia, hynrei ka sorkar kala shimkhia ia kine ki kam kiba bun ki jingtynjuh.
“Ka jinglah ban shna pyndep ia kane ka projek kadei namar ka jingdon bynta jong baroh kiba la noh synniang hala i jong i bynta ban pynthikna ba kadei ban poi sha ka thong bad kane kala urlong mynta” ong u Conrad.

“Da ka jingai wai 30 snem ka MTDC ia kane ka Hotel kan ioh iaka khajna kaba kot palat iaka T.100 Klur bad kane kan pynlong iaka MTDC kaba khlain haka jingdon iaka pisa tyngka. Ka sorkar jylla ka khmih lynti ba ha kine ki 30 snem kiban wan, lyngba ka khajna GST, kan ioh lum palat ia ka T.500 klur ka khajna tang na kane ka Hotel” ong u Myntri Rangbah.

Haba phai sha ki briew kiban trei ha kane ka 5 Star Hotel, u Myntri Rangbah ula ong ba kumba 80 na ka 100 kin dei hi ki trai shnong jong ka jylla kiba hap ban trei shabar ka Jylla baroh shikatta.

U la ong, kane ka Hotel kan aikam ruh ia kiwei kiwei ruh lada kam dei ba ka thung iaki kum ki nongtrei hynrei ki briew kiba kamai da kaba niah kali kin ioh ban kamai jakpoh, ka jingpynpoi iaki marbam mardih bad kiwei kiwei.

U Myntri Rangbah ula kyntu ia ki nongpyniaid jong kane ka Hotel ba kin ialeh ruh ban pyndon kam ia ki jingbam biskit kiba la shna da ki Self Help Group ne kino kino ki tiar ki tar khnang ba ki briew kiba wan sahkai ha kane ka Hotel kin sah jingkynmaw.