Resubelpara, Nohprah 18 : U Myntri Rangbah ka Jylla Conrad K Sangma ula plie paidbah ia 17 tylli ki Food Processing Unit ha Ri-Lum Garo kum shibynta na ka jingrakhe ia ka sngi ki Nongrep ne Farmers Day, kaba long hynne ka sngi Nyngkong ha Resubelpara.
U Myntri Rangbah ula pyntip ba ka Sorkar kan sa plie sa palat 100 tylli ki Food Processing Unit ha kine ki khyndiat bnai ban wan. Kine ki processing unit kin plie lynti ia ki nongrep ba kin ioh song pynwandur bha ia ki mar ki ban kyntiew ia ka dor ha ka iew ka hat.
Ka jingialang ha Jonglapara, Resubelpara, North Garo Hills, ka dei shibynta ban rakhe ia ka sngi ki Nongrep, kaba ju rakhe manla u snem ha ka 4 tarik Nohprah ha Jylla, kaba la pynbna da ka Sorkar MDA ba ialam da ka NPP. Ka dei ka sngi ban leh burom ia ka synniang jong ki nongrep ban kyntiew ia ka ioh ka kot ka Jylla. Ia kane ka jingrakhe la pynlong kham slem namar ka jingbun kam jong u Myntri Rangbah ha kiwei pat ki kam.
As a Govt. our commitment to farmers is evident through many of our welfare schemes. Today our farmers produce like fruits, vegetables and spices are gaining recognition across the country and in many parts of the world. We will continue to support the farming community through… pic.twitter.com/pQCnw4CBUy
— Conrad K Sangma (@SangmaConrad) December 18, 2023
Haba ai jingkren, u Myntri Rangbah ula ong ba 80% na ki nongshongshnong ka Jylla ki dei kiba don bynta ha ki kam rep bad kiba trei shitom ban pynthikna ia ka jingpahuh ka marbam ha Jylla bad kumta ka Sorkar kala rai ban kynmaw burom ia kane ka sngi na ka bynta ki nongrep da kaba ai jingiarap ia ki bad jingkyrshan lyngba ki skhim bapher bapher ka Sorkar ki ban pynlah ia ki ba kin kynjoh ia ka thong ba ki don ha ka rep ka riang.
“Ka jingthmu hi ka long ban kyntiew ia ka ioh ka kot ka Jylla na ka mynta kaba long na ka T.45000 klur sha ka $.10 billion da kaba wanrah lang ia ki prokram ka Sorkar bad ki jingkyrshan ia baroh ki kynhun. Kane ka jingphohsniew ka lah ban urlong lyngba ka jingiarap ia ki kam jong ki nongrep, ki nongsengkam, ki samla lyngba ki prokram bapher bapher ka Sorkar kum ka PRIME, CM-Elecvate Programme da kaba ai jingkyrshan bad ka rynsan ba kin pynheh ia ka kam ba ki trei ka ban kyntiew pat ia ka ioh ka kot jong ka Jylla” ula ong.
Kum shibynta na ka prokram, u Myntri Rangbah ula sam ia ka cheque jong ka FOCUS, ka YESS bad PES (Payment on EcoSystem) ba T.2.5 klur sha ki nongioh jingmyntoi jong ka ri-lum Garo bawei kawei.
Haba kdew sha ka YESS Meghalaya kum ka prokram kaba jop, u Conrad ula bynta ba haduh 3000 ngut ki samla kila ioh jingmyntoi na kane ka skhim. Ula kyntu ia ki samla ba kin register ialade ha ki prokram bapher bapher ban ioh ia ki subsidy jong ka Sorkar kaba long haduh 75%.
Ia u Myntri Rangbah la synran da u Myntri ka Tnad PHE Marciuse Marak, Symbud Lamphang bad MLA ka thain Timothy Shira, u MLA ka Bajengdoba Pongseng Marak, u MLA ka Kharkutta Rupert Momin bad kiwei kiwei.
