Shillong, Nohprah 18: Ka Meghalaya hynne ka sngi Nyngkong, kala pynliem ia ka Manipur da 152 run ha ka U-19 Men’s Cooch Behar Trophy kaba la long ha MCA Ground, Polo, Shillong.
Kane ka jingjop ka Meghalaya kala pynlong ia ka ban don ha ka kyrdan ka baar kata hadien jongka Nagaland kaba ka Meghalaya kala shah pynliem teng ha ka jingiakhun bad kine ki ar tylli ki kynhun mynta kila ioh rung sha ka Semi Final.
Ha ka jingiakhun kaba khatduh jong ka sngi kaba saw, ka Meghalaya kala tied 320 run bad hap lut ki nongtied bad hashwa kane kala pynhap lut ia ki nongtied ka Manipur kaba la kamai 267 run. Hadien kane ka Meghalaya kala kamai 216 run ha ka jingleit teid ka baar kaba la buh ia ka Manipur ban donkam ban kamai 270 run ban jop ia ka jingiakhun.
Ka Manipur kaba la tied hynne ka sngi kala mad ia ka jingeh haba ki nongtied kila khyllem noh dang kloi bad ki nongtied kila hap lut bad kamai 117 hapoh jong ka shi kynta.
Baroh ki nongkawang bol ka Meghalaya kiba la pyndonkam hynne ka sngi, kila shim wiket lut, u Kishlay Vishlux, u Shavian Blah, Angkit Tamang, u Avinash Rai kila ioh mar 2 wiket, u Balgrik Sangma ula ioh shi wiket.
Ha katei ka jingiakhun kaba 4 sngi u Shavian ula ioh khur 7 wiket bad ai 88 run.
Ka Meghalaya kan iakhun pyrshah ia ka Arunachal Pradesh ha ka Semi Final kaban long ha nongbah Shillong bad ia ka tarik jong kane ka jingiakhun yn sa pynbna kham hadien.
Ka kynhun jong ka Meghalaya kala dep ban pynrem teng ia ka Arunachal da 76 run.
