Shillong Jymmang 28: Kum ka dak ban rakhe ia ka lyngkhuh sngi ka jingwan iuhkjat jong u Thomas Jones kaba 175 snem sha kane ka jylla, hynne ka sngi Palei u Symbud Myntri Rangbah ka Jylla u bah Prestone Tynsong ula plie ia ka Prayer Hall jong ka Presbyterian Church of India ha ka shnong Kutmadan, Sohra kaba la tip kum ka Thomas Jones I Prayer House.
Ha kane ka sngi, la iadon lang ryngkat u MLA ka Sohra u Bah Gavin Mylliemngap, ki dkhot jong ka PCI, ki Nongsharai Balang bad kiwei kiwei kiba la shah khot sngewbha bad la pyniphuh pyniphieng ia kane ka jingialang da ki jingrwai na ki samla ka Balang.
Haba kren ha kaj ingialang, u Bah Prestone Tynsong ula ong, ba kane ka long ka sienjam kaba bha tam ia kaba ka PCI kala leh bad khamtam eh ban burom ia ka sngi kaba u Thomas Jones ula wan sha ri Khasi ban wanrah ia ka thoh ka tar ban seng ia ka niam ha kane ka thaiñ.
Ula ai ruh ia ka jingkular ban shimkhia bad ka Sorkar Jylla ia ka jingkyrpad jong ka PCI ban tei ia ka Thomas Jones Complex bad ula pyntip ba u lah dep ban leit iakynduh ia u Myntri Rangbah ka Jylla u Conrad Sangma ryngkat lang bad ki Pastor ban iarap ban mang ia ka pisa khnang ban pynurlong ia katei ka jingthmu kum ka dak ban burom ia Thomas Jones u riewkhraw ka thoh ka tar jongka jaidbynriew Khasi.
U Bah Prestone ula pynpaw ruh ba u don ka jingngeit kaba skhem ba ka jingdon kane ka Prayer House kan long ka jingkyrkhu ia baroh kiba leit ban buh jingduwai kyrpang.
