Shillong, Sep 19: Ka Meghalaya Football Association ha ka sngi Saitjain kala plie pyrda ia ka Meghalaya Women’s State League 2025 da ka jingiakhun hapdeng ka Laitkor SC pyrshah ia ka Na Rympei Football Academy kaban dei ka jingiakhun kaba nyngkong eh ha SSA Stadium, First Ground, Polo bad kane ka jingiakhun ka sdang ha ka por 5 baje janmiet.
Ka Laitkor SC ka dei kaba bat ia ka nam lahduh jong ka Shillong Sports Association’s Women’s League 2024, katba ka Na Rympei FA kala jop ia ka nam lahduh jongka Ri-Bhoi District Sports Association.
U Myntri ba thymmai ka tnad Sports and Youth Affairs u Bah Wailadmiki Shylla, ula mynjur ban wan ban plie ia kane kaj ingiakhun kaba nyngkong.
Kane ka lympung iakob ialehkai ki kynthei kan wanlam ia ki 13 tylli ki kynhun kiba la wan shakhmat ha ki jingiakob kiba la long ha ki district kiba la pyniasoh bad ka Meghalaya Football Association. Kala long ka jingangnud kaba la slem bha jong ka MFA ban pynlong ia ka women’s league bad kane ka jingnangnud kan urlong noh mynta.
Ka MWSL kan plie lad ruh ia ki synjuk ialehkai ka Meghalaya ban ioh iashimbynta ha ka Indian Women’s League Second Division (IWL 2) ha ka sien kaba nyngkong eh.
La pynwandur ia ka MWSL da kaba pynshong nongrim hadien ka jingseisoh bha jong ka Meghalaya State League, ka lympung iakob ialehkai jong ki shynrang, ia kaba la kyrshan pura da ka sorkar jylla. Ki Association jong ki District kiba la pynlong ia ki Women’s League kin lah ban phah ia ka kynhun lahduh bad kaba wab baar ban iashimbynta ha ka MWSL.
Kila don 8 tylli ki District Association kiba ju pynlong ia ka Women’s League bad 13 tylli ki kynhun kila pynthikna ban iashimbynta ha kane ka jingiakob ialehkai hapoh ka jylla Meghalaya.
Ka Laitkor SC, Na Rympei FA, Pay For Right Football Academy (Runners-Up SSA), Lapalang SSCC (Runners Up ka Riwar Mihngi Football Association) bad ka Attacker’s Youth Club Pahamsyiem (Runners Up ka RBDSA) kin don ha ka Group A. ki jingiakhun ki jongki kin long ha SSA Stadium kaba don marjan bad ka madan MFA.
Ha ka Group B kin don 6 tylli ki kynhun kiba kynthup ia ka Mawlum Tyrsad SC (Champion ka Tyrsad Area Sports Association), Jakrem SC (Champion ka Mawkyrwat District Sports Association), Young SSCC (Champion ka Pyndengumiong District Sports Association), Mawten SC (Runners Up ka MDSA), Bright Future SSCC (Runners Up ka PDSA) bad ka Mawsawrit SC (Runners Up jongka TASA). Ki jingiakhun ki jongki kin long ha Mawlum Tyrsad Ground.
Ha ka Group C ka don tang 2 tylli ki kynhun na Jaintia Hills kiba kynthup ia ka Diengshynrum SC (Champion jongka East Jaintia Hills District Football Association) bad ka Chirupheiwi Nongkynrih FC (Champion jongka Laskein Block Sports Association). Namar ba don tang 2 tylli ki kynhun kumta kin iakhun pyrshah arsien.
Kum ka jingshim ia ka sienjam kaba nyngkong, ka MFA ka dap da ka jingsngewkmen ba kine ki 13 tylli ki synjuk ialehkai kiba na kylleng ki bynta jong ka jylla kila iasoi ban iashimbynta ha kane ka lympung iakob bad la khmih lynti ba lada kane ka jingiakob kan long kaba iaid beit bad kaba jop, kumta kan pynshlur shuh shuh ia kiwei kiwei ki kynhun ialehkai football ki kynthei ba kin wan ban iashimbynta ha ki snem ban wan ha ka Meghalaya Women’s State League.
