Shillong, Nohprah 03:U President ka BJP Meghalaya u Bah Ernest Mawrie bad u MLA ka BJP u bah Sanbor Shullai hynne ka sngi saitjain kila plie iaka ophis treikam jong ka BJP West Jaintia Hills District kaba don ha Khliehmuchut,Shangpung.
Ha kane ka sngi la iadonlang ka Kong Sumita Laloo kaba dei ka nongkhmih jongka BJP Manipur, u MDC ka BJP u Bah Lakhon Biam, ka President ka BJP Mahila ka Kong Judy Surong, ki nongialam bad ki nongkyrshan ka BJP.
U Bah Ernest Mawrie haba kren haka jingialang ula ong, ki paidbah kim dei ban ngop ha ka jingpynbeij pisa 5000 tyngka hynrei kidei ban jied iaki nongmihkhmat kiba lah ban wanrah iaka roi ka par bad dei tang ka seng BJP kaba lah ban ai iaka roi ka par bad ka jingiarap iaki paidbah bad kam long kum kiwei pat ki seng sain pyrthei ba hashwa ka elekshon ki ai jingiarap bapher hynrei ha kaba khatduh ka pisa kaba ioh kadei tang ka ram.
Ula ong, ka sorkar BJP kala synshar la 8 snem iaka ri bad ka BJP ka ieng ha ka nongrim ban burom ia baroh ki jait niam bad ia kane lah ban sakhi ba baroh ki jait niam ki ioh rakhe bad ki shongshit haka jinglehniam lehrukom.
“Lada ki paidbah ki kwah ban pynduh noh ia ka High Level kidei ban jied noh iaka BJP” ong u Bah Ernest Mawrie bad ka ong, “Kiwei kiwei ki jylla kiba marjan kila don ia la ki jong ki Medical College, hynrei kaba sngewsih ka long ka jylla Meghalaya kam don wat tang kawei ka Medical College ruh haduh mynta”.
Katba u Bah Sanbor Shullai ula ong, u Myntri Rangbahduh ka ri u Narendra Modi bad ka seng BJP ki trei shitom bha na ka bynta ban wanrah iaka roi ka par ha baroh kawei ka ri bad ban pyntreikam iaki skhim bapher na ka bynta ki samla, ki longkmie bad kiwei kiwei.
Ula kyntu iaki paidbah ba lada ki kwah ban ioh iaka roi ka par kidei ban jied iaka BJP bad kidei ruh ban pynjop don burom ia u Bah Lakhon Biam haka elekshon MLA 2022 na Raliang Constituency..
U Bah Lakhon Biam ula ong ba ka BJP kan thaw iaka sorkar Meghalaya ha u snem 2023 bad kan dei ka sorkar kaban ym don ka kam bamsap.
