Nongpoh, Naiwieng 06 : Ka SELCO Foundation hynne ka sngi Nyngkong, kala plie bad aiti ia ka kamra pynkha khunlung (Labour Room and Maternity Ward) hapoh ka Umroi Health & Wellness Centre, kaba la pyntrei lyngba ka Aspirational District Programme jong ka NITI Aayog.
Ia kane ka kamra pynkha khunlung la plie paidbah da u MLA ka thain Bah Damanbait Lamare kum u kongsan ha ka jingiadonlang ruh u Bah Rangkynsai Kharbuki, MDC ka Umroi, u Arpit Uphadhayaya, Deputy Commissioner ka Ri Bhoi District, ka Dr. T.S Momin, District Medical & Health Officer, u Bah PB Sylliang, Chairman ka Umroi Dorbar Pyllun lem u Ajinkya Hande, Programme Manager ka SELCO Foundation bad kiwei kiwei.
Ka SELCO Foundation ka dei ka kynhun kaba la ia soi ia ka Memorandum of Understating (MoU) bad ki bor pyniaid district ban tei ia ki jaka sumar paidbah kum ki Health Sub Centre katkum ka juk ba mynta ban ai ia ki jingshakri paidbah kaba janai bad ka bym don kano kano ka jingma lada wan lynshop ki bor ka mariang.
Haba kren ha kane ka sngi, u Bah Damanbait Lamare, kum u nongmihkhmat paidbah, u la ai ia ka jingiaroh ia ki nongsharai ka Balang Prebyterian Umroi, halor ka jingwan shakhmat ban tei ia ka jaka pynkha khyllung ha ka jingiatreilang bad ka SELCO Foundation, kaba long shisha ka jingmyntoi ia ki longkmie ban ioh ia ka jaka sumar kaba paka hapoh ka shnong ka thaw bad ka thain hi baroh kawei.
