Shillong, Naiwieng 6: Da ka jingshimkhia halor ka jingkiew ka jingpyndonkam ia u Drok, ka Mawlai Town Dorbar (MTD) kala shim ia ka rai rangbah ban ai jingiarap ia ki riewshimet kiba iakhun ban lait naka jingkyrni haka jingdih drok.
Ia kane ka sienjam la shim ryngkat bad ka jingiatreilang bad ka Manbha Foundation, ha kaba kin pyrshang ban ai jingim ia kito kiba iakhun pyrshah ia ka jingkyrni ha ka jingdih drok lyngba ka De-addiction bad Rehabilitation Programme ha Mawlai Mawkynroh Rehab Centre.
Ka thong kaba hakhmat jong kane ka shnong ka thaw ka long ban tehlakam ia ka jingpyndonkam ia u drok hapoh ka thaiñ Mawlai bad ka jingktah jong une u jingdih ba sniew ia ka imlang sahlang.
Kila shim ruh ba ka mat jong u drok kam dei shuh tang kaba ktah ia ka ïing ka sem hynrei ka donkam ia ka jingiatreilang da baroh da ka jingthmu ban pynshai bad pynsngewthuh shaphang ki lad ai jingsumar. Hynrei kan long ruh kum ka rynsan ban pdiang ia kane ka jingkylla kynsan ha ka imlang sahlang bad ban pynapw shai iaka jingdonkam ban tuklar noh mardor.
Naduh bala sdang, kane ka prokram kala ioh ia ka jingphai khmat na kiba bun ki nongdih drok kiba kwah ban ioh ia ka jingsumar lyngba ki de-addiction center bad kumba long mynta ki don 21 ngut ki riewshimet kiba la pynrung kyrteng ha katei ka prokram, kaba la iatreilang hapdeng ka Mawlai Town Dorbar bad ka Manbha Foundation.
Ha ka jingplie ia kane ka prokram la iadonlang ka Dr. Rika Lamar jongka Manbha Foundation, u SP (City) ka East Khasi Hills Bah Vivek Syiem, u Vice Chancellor ka NEHU u Prof. PS Shukla, Bah Teibor Pathaw MDC ka Mawlai Constituency.
La wan ruh ban iashimbynta lang ha katei ka jingialang da ki nongialam shnong bad ki bahaiing bahasem jong kito dkhot kiba iashimbynta ha katei ka prokram.
