Nongpoh, Risaw 02: Ka Dorbar Shnong Nongthymmai jong ka Raid Madan Kyrdem hynne ka sngi Nyngkong, kala plie paidbah ia ka jaka leit bar paidbah (Public Toilet) shibynta ka jingrakhe jong ka ri ia ka sngi lehkhuid kaba dei ruh ka jingrakhe kyrpang ia ka lyngkhuh sngikha kaba 154 u Kpa ka Jaidbynriew u Mahatma Gandhi lane ka Gandhi Jayanti.
Ia kane ka jaka leitbar paidbah la mang kyrpang na ka MDC skhim ha ka jinglut kaba la kot kumba 3 lak tyngka, kaba la wanrah ban pynneh ia ka jingkhuid jingsuba bad ban iada na ka jingleit bar pathar ki riew paidbah.
La plie paidbah ia kane ka skhim da u Bah R.R Kharbuki, MDC ka Umroi Konstituensi kum u kongsan ha ka jingiadonlang u Rangbah Shnong Bah Pherlus Mawroh, u Bah Stephan Shadap, u Bah R Lynshing, u Bah Bhalad Mukhim lem bad kiwei kiwei.
Haba kren ha kane ka sngi, u Bah Kharbuki, u la pynpaw ia ka jingkmen kaba khraw ban ia don bynta lang bad ki bor pyniaid shnong ha ka jingrakhe ia ka Gandhi Jayanti bad ban plie ruh ia kane ka jaka leit bar paidbah kaba long kawei na ki lad ban iada na ka jingleit bar pathar jong ki riew paidbah.
U la ong, ka khuid ka suba ka dei kawei na ki bynta ba kongsan bha ha ka jingim briew ban ioh ia ka koit ka khiah. Ula ong ba ka jingleh khuid ha ki kyrpong iing ne ha ki shnong ki thaw ka dei ban iai bteng beit man ka sngi ym tang ban shu kynmaw tang ha kito ki sngi ba don ka jingrakhe kyrpang, da kaba bynrap ruh ba ki nongshong shnong ki dei ruh ban ri ban sumar ia la ka mei mariang.
Na ka liang ka Dorbar Shnong Nongthymmai Kyrdem ha kane ka sngi ka la ioh ruh ban pynlong ia ka jingpynkhuid shnong ia kaba la shimbynta da ki nongshong shnong hi baroh kawei.
