Shillong, Nohprah 28: Ka MLA ka Sutnga-Saipung Kong Santamary Shylla hynne ka sngi Palei, kala plie paidbah iaka tamasa ba arsngi bala tip ka Jaiñtia Hills Winter Festival ha Madan Lyngkieñ, Ialong, West Jaiñtia Hills.
Kane ka tamama ka dei kaba la pynlong da ka Seiñraij Ialong ha ka jingiatreilang bad ka tnat Tourism lem bad ka Arts and Culture ka Sorkar Jylla. La plie ia ka haka jingdon lang u Bah SD Shylla, u ophisar ka tnat Tourism ka West bad East Jaiñtia Hills bad u Bah Pyrkhat Shylla, u President of Seiñraij Ialong lem bad kiwei kiwei de.
Ka phangpdeng jong ka tamasa kadei ‘Harmony Across Borders,’ kadei naka bynta ban kyntiew iaka kam jngohkai pyrthei hapoh ka thain Jaiñtia Hills ka Jylla Meghalaya naka bynta ban pyni nam iaka jingriew spah ka thain haba iadei bad ki jaka ba itynnad.
U Bah SD Shylla ula pyntip ba ka Ialong Tourist Village kala pdiang haduh 40,000 ngut ki nongwan shang pyrthei ha u snem 2022 bad ula ong ba mynta ka kynti, ka tamasa Jaiñtia Hills Winter Festival kan nang lah shuh shuh ban khring iaki nong wan shangkai.
Ka Kong Santamary Shylla kala iaroh iaka Seiñraij Ialong bad iaka tnat Tourism kiba la pynlong ia kane ka tamasa ban kyntiew iaka kam jngohkai hapoh ka thain.
Ka kyrmen ruh ba kane ka tamasa kan long kaha jop bad kan nang iaid shakhmat ha ki snem ban wan bad kala kyntu iaki trai shnong ban pynneh iaka jingleh khuid ha baroh ki jaka jngohkai pyrthei.
Ha kane ka tamasa ba arsngi, la sakhi ki nongtem na kylleng ka Jylla Meghalaya bad naka thain Northeast kynthup ruh u J-Sol naka Ri Britain.
