Nongpoh, Nohprah 28 : Ki Pulit ka Pilangkata Outpost, kila ioh ban kem ia arngut ki briew kiba donkti ban tuh haduh 24 tylli ki battery jong ki tower mobile ba don ha shnong Lalmati.
Ia kine ki nongtuh la ioh kem ha ka 26 tarik Nohprah bad la tip kyrteng ia ki da u Bipul Marak uba dei na Umdem bad u Pewarson Marak uba dei na Lalmati.
Halor ka jingphla jong kine ki arngut, ki Pulit ka Pilangkata hapoh ka jingialam u Incharge Nurul Islam, kila leit ban khynra ia kawei ka jaka kaba don ha Burnihat Amtola, Assam hynrei kim shym la lapdien shuh ia kine ki battery namar u trai kane ka jaka ula pynkynriah sha kawei pat ka jaka.
Ki Pulit ki iathuh ba une u briew ula phet rieh ialade bad ka jingthwet ia u kala iaid shakhmat. Ki Pulit kila kurup noh tang ia kawei ka kali pickup kaba don u nombor AS01-NC-9804 kaba pyndonkam ban kit ia kine ki battery.
Ki Pulit kila register case halor kane ka jingjia bad ka jingtohkit mynta kala iaid shakhmat.
