Shillong, Risaw 28: Ka kyrtong jong ka All India Trinamool Congress (AITC) ka ban aireng na 17- North Shillong Constituency ha ka ilekshon 2023 kong Elgiva Gywneth Rynjah hynnin ka sngi palei, ka la plie ïa ka Shalyntem Multipurpose Society ka jaka ai jinghikai computer ha Jaiaw Pdeng
Ka jingplie iaka Shalyntem Multipurpose Society kadei naka bynta ban ailad ia ki khun samla kiba wan na ki longïing longsem kiba duna ha ka ïoh ka kot ban ioh jinghikai Computer.
Kane ka Shalyntem Multipurpose Society ka don ha Jaïaw Pdeng marpyrshah bad ka Robert Hospital bad ki khynnah kiba wan shah ai jinghikai ha katei ka jaka kim donkam satia ban siew pisa eiei.
Haba kren ha kane ka sngi ka kong Elgiva ka la ong ba ka Shalyntem Society ka dei ka jingthmu ha ka jingim jong ka ban seng ha ka por ba ka mut ban ïeng ïa ka ilekshon.
Ka kong Elgiva ka la ong ba haba peit ha ka liang ka pule ka puthi ka jylla Meghalaya ka la hiar bha haduh katta katta bad kum ka samla jong ka constituency kam lah ban shu shong bad peit ia ki khun samla ba kin shu sahkut bad sakma bad kim longbriew.
“Ki khun samla kim dei ban duh jingkyrmen haka liang ka pule puthi bad kidei ban shim kabu naka Shalyntem Multipurpose Society lada ki don ka mon ban shah pyntbit haka liang ka computer ” la ong ka kong Elgiva.
Ha kane ka sngi plie iaka Shalyntem Multipurpose Society la don lang u president ka Shalyntem Society, u bah Mike Thangkhiew, u bah Wanlambok Sohliya u ba dei u Secretary ka Shalyntem Society bad kiwei kiwei de.
