Shillong, Risaw 28: U Myntri ka Tnat Pynroi Sor ka Jylla Bah Sniawbhalang Dhar ula pynpaw ia ka jingsngewskhem ba ka National People’s Party (NPP) kan khur ia ka jingjop na baroh 7 tylli ki Constituency jong ka Ri-lum Jaintia.
“Kum ba paw mynta ka kynti ka National People’s Party (NPP) kan jop lut ha baroh 7 tylli ki constituency jong ka Rilum Jaintia” ong u Bah Sniawbha haba iakren bad ki lad pathai khubor hynnin ka sngi palei.
Une u Nongialam ka NPP ula kam ba ki paidbah ka Ri-lum Jaintia bad ka Jylla Meghalaya baroh kawei, kin sa phai khmat sha ka NPP ba kan thaw biang ia ka Sorkar hadien ka elekshon MLA 2023.
“Kumba paw mynta ka kynti ki paidbah ka Rilum Jaintia Hills kin jied iaka NPP bad kin pynjop lut ha baroh 7 tylli ki constituency watla kan don ka jingiakhun kaba jur pyrshah iaka United Democratic Party (UDP)” la ong u bah Sniawbhalang.
U bah Sniawbhalang ula ong ka jingiakhun jong ka NPP bad UDP kan jur bha ha Ri-lum Khasi bad Jaintia hynrei ki paidbah kin phaikhmat beit shaka NPP ban thaw sorkar namar kila sakhi ba ka sorkar Meghalaya Democratic Alliance (MDA) ba ialam daka NPP ka dei kaba trei naka bynta ki paidbah ha kine ki 4 snem shiteng ba la leit.
Ula kam ruh ba ba hapoh Rilum Garo, ka NPP kan khur jingjop palat 80% ki Seat namar ka jingiapait iapra hapdeng ka Congress bad ka All India Trinamool Congress (AITC) bad kumjuh ruh namar ka jinglah jong u nongialam ba radbah ka NPP u Conrad K Sangma u badei ruh u Myntri Rangbah ka jylla ban trei shitom naka bynta ka jingmyntoi ki paidbah bad ka thain Garo Hills baroh kawei.
