Nongpoh, Jymmang 31 : Ka Khasi Hills Autonomous District Council (KHADC), hynne ka sngi Balang, kala plie paidbah ia ka Iingkashari District Council ha Nongpoh ban pynsuk bad pynaram ia ki paidbah ka Ri-Bhoi District, kiba donkam ia ka jingshakri jong kane ka Iingkashari ka Council.
Ia kane ka Iingkashari la plie da u Chief Executive Member (CEM) ka Council Bah Titosstarwell Chyne ha ka jingiadon ryngkat u Chairman ka Council Bah Lamphrang Blah, E.M Building Bah Teibor Pathaw, EM Market Kong Grace Mary Kharpuri,, u Judge ka District Council Bah S Kharsyiemlieh bad kiwei kiwei ki MDC.
Ka jingthmu ba hakhmat eh jong kane ka Iingkashari ka long ban pynjan ia ka jingshakri jongka Council sha ki paid nongshongshnong ka Ri-Bhoi bad ban pynsuk ia ki ha ka leit ka wan ban leh ia ki kot ki sla ba donkam naduh ki Birth Certificate, ka jingiakhun mukotduma khyndew bad kiwei kiwei.
Haba kren ha ka jingialang, u Judge ka District Council Bah S Kharsyiemlieh ula pyntip ba naduh ba u la shimti ïaka kam u la don ka jingpyrkhat ban pynjan ïaka jingbishar ka Iingkashari sha ki paidbah haba bynrapba dei tad haduh kane ka EC kaba mynta haka jingïalam u Bah TW Chyne, katei ka jingangnud kala urlong.
“Naduh ki thaiñ khappud jong ka Ri-Bhoi kiba jngai ka leit ka wan ki hap ban wan shaduh nongbah Shillong haba don ki jingkajia bad ki mukotduma” ong u Bah Kharsyiemlieh.
Haba kren ha kane ka sngi, u Bah Titoswell Chyne u la pynpaw ia ka jingkmen kaba khraw ban ioh plie bad aiti ia kane ka District Council Court kum ka iingbishar kaba pura hapoh ka ophis jong ka KHADC ha Ri Bhoi District, da kaba pynurlong ruh ia ka jingthmu ban pyniajan ia ki paidbah riewlum ha kaba ia dei bad ka kam bishar khaddar bad ruh ban pynsuk ia ki ha kiba bun ki liang.
U la pynpaw ruh, ba katkum ka Administration of Justice, ki paidbah riewlum kiba im hapoh u pud u sam jong ka Schedule Area, ki don ia ki iingbishar ym dei tang ki District Court, hynrei ka bishar ka khaddar ha ki khasi ka dei naduh ki Dorbar Shnong bala tip ki Village Court bad ki Additional Subordinate Court jong ki Hima.
Ula ong ba la dei ruh ban pynthymmai ne pynkhie im ia ki Village Court, ki Additional Subordinate Court.
“Ka jingdon jong ka Iingkashari hangne kan ai ia ka jingshakri ia ki paidbah naduh ki Birth Certificate, kino kino ki jingiakynad ne mokotduma ba ki paidbah kane ka district ki donkam naduh ki mukotduma iaknieh jaka para Khasi bad ka mukotduma baibam ia kiba iaphet lok nalor kiwei kiwei” ula ong.
U CEM u la phah ruh ia ka khubor sha ki bor pulit, ba kino kino ki mukotduma kiba ia dei bad ki para riewlum ne tribal case ki dei ban phah ne refer sha ki District Council Court.
