Shillong, Jymmang 22 : U Myntri Rangbah ka Jylla Conrad K Sangma, hynne ka sngi Palei, ula ot ribon ia ka German Language Training Programme ha Shillong Tech Park-na ka bynta ki Nurse ka Jylla kiban leit trei sha ri Germany.
Kane ka prokram kaba la kyrshan da ka Meghalaya State Skill Development Society (MSSD) hapoh ka Tnad Labour, Employment & Skill Development, ka dei kaba la pynlong ban ai jinghikai ia ki Nurse kiba la shah jied na Jylla ba kin leit trei sha ki jaka sumar bapher bapher ha Ri Germany.
Hadien ka jingjop ban pynpoi ia ki Nurse ka Jylla ban trei ha Japan bad Singapore, ka Germany mynta kala kylla long ka jaka kaba bud kaba ai ia ka rynsan ha ka pyrthei na ka bynta ki Nurse bad ki Nongtrei ka Koit ka Khiah ka Jylla.
“Kaei kaba ngi leh mynta ka sngi hangne ka long ban pynkylla ia ka jingtynjuh sha ka kabu kaba khraw. Ka Meghalaya ka don ia ki Nongshongshnong ba dang iakhynnah tam hapoh ka Ri bad ngi la pynlong ia kane ka kabu kum ka bor ha ka pyrthei. Lada ngi phah wat 30,000 ngut ki riewshemphang shabar ri, ka jingphah pira jong ki kan kot sha ka T.250 klur shibnai-kata T.3000 klur ha ka shisnem sha ki kti jong ki bahaiing hasem” ong u Myntri Rangbah.
U Conrad ula kular ia ka jingkyrshan ba pura na ka Jylla, kynthup ia ka jingiarap pisa na ka bynta ki jinghikai bad ban tei ia ki jingshaniah ha kaban ioh trei shabar ri bad ong “Ki Kmie Kpa mynshuwa ki don ka jingartatien namar ka jingsngewkhia halor ka jinglut jingsep bad ka jingshngain. Mynta, ka Sorkar ka ieng kum ka guarantor. Ngi don hangne ban pynthikna ba ki khun ki kti jong ki kin shngain, kin ioh ia ka jingtbin lynti bad ai ia ka kabu kaba biang palat”.
U Myntri Rangbah ula pyntip ruh ba un sa leit synran hi dalade ia ka kynhun first batch na ki kyrtong kiba shah jied ban leit sha Germany.
Ula ong ruh ba kane ka jingiatreilang kan nang pynkhlain ia ka jingiadei hapdeng ka India bad ka Germany bad u sngew sarong ba ka Meghalaya lyngba ki nongtrei samla ka lah ban long shibynta jong kata ka khana jongka jingroi.
“Ka Germany kala iakynduh ia ka jingduna ha ka jingdon ki nongtrei ha ka koit ka khiah. Hapoh u 2035, ngin donkam sa 7 mllion ki nongtrei kiba tbit. Ka prokram mynta ka sngi ka pyni ïa ka jingïaid lynti kaba pynkylla ïa ka jingim — kine ki samla kin ym trei tang ha Germany hynrei kin roi, kin noh synñiang, bad kin kiew.” ong ka Andrea Jeske, Deputy Consul General kaba mihkhmat ïa ka German Consulate Kolkata haba pynpaw ïa ka jingkyrmen kaba khraw halor kane ka jingïatreilang.
Ka la kren ruh halor ki polisi thymmai jong ka Germany shaphang ka jingwan buhai shnong kum ka Opportunity Card bad ka Skill Immigration Card, kiba ai ïa ki lad ki lynti kiba kham suk na ka bynta ki nongtrei ki bym dei na ka European Union.
U Jan Eben, Country Director General of People to Help Germany, ula pynpaw ia ka jingtreikam ba pura jong ka prokram bad ong ba kane ka jingïatreilang kam dei tang shaphang ka jingioh kam hynrei ka dei shaphang ka jingtei ïa ki jingim.
