Shillong, Jylliew 09 : Ka Meghalaya kan sa iohi ia ka jingkiew kaba jur ha ka jingaikyrdan Performance Grading Index (PGI) jong u snem 2026-27, ong u Myntri ka Tnad Pule Puthi ha ka sngi Ba-ar, haba ainam ia kane ka jingkiew bala khmih lynti sha ki jingpynkylla kiba la leh ha kine ki phra snem bala leit noh.
U Bah Lahkmen ula iathuh ba ka jingpynleit jingmut jong ka Sorkar kala long eh halor ka jingpynkhlain ia ka rukom pynaid ia ka pule puthi, ym tang ban iabeh ia ka jingaikyrdan PGI.
“Peit, nga sngew ba kane ka kam ka dei kaba biang eh ban iakren, ym tang ban shu iakren. Nalor kane, kaei kaba ngi hap ban khmih ka long la ka Sorkar kala leh eiei ne em. Kane ka dei ka mat kaba kongsan. Mynta, hato ka Sorkar kala leh eiei halor kane? Ka jubab ka long hooid, hooid, namar manla u snem, ka ju don beit ka jingnang kiew ha ka jingioh kyrdan” ula ong.
U Myntri ula pynpaw ia ka jingbha ka rukom ai jinghikai, ka bha ka miat ki khynnah pule bad ki nonghikai bad ka jingioh leit skul kum ki kam kiba khraw kiba ka Sorkar kala leh.
“Nga thikna ba ha ka jingaikyrdan PGI 2026-27, ka kyrdan jong ngi kan kiew bha, namar kaei kaba ngi la leh ha kine ki phra snem ki dei ki bym pat ju leh mynno mynno ruh. Ym tang ban leh eiei halor ka PGI, hynrei ban leh eiei halor ka jing bha ha ka rukom ai jinghikai, leh eiei halor ka bha ka miat ki khynnah pule, ki nonghikai bad kiwei kiwei” ula ong.
Ula wer ia ka jingpyrshang ba iai bteng na baroh kiba don ha ka tnad bad ong b aka kam ba hakhmat eh ka dei ban iai long ka jinghikai ia ki khynnah pule.
“Kumta, ngi hap ban trei shitom, bad trei ym tang mynta ka sngi, hynrei ngi hap trei shitom man la ka sngi. Ngi ha ka Tnad Pule Puthi ngi la trei shitom bha, la ka long ki Ophisar, ki Nonghikai lane ki nongpyniaid kam, ngi hap ban trei shitom. Namar wat khmih ia ka jingioh kyrdan PGI, hynrei peit ia ki skul bad kumno ban pynbha ia ka rukom ai jinghikai namar ki kam ba hakhmat eh ka long ban ai ia ka pule dangle kaba bha sha ki khynnah pule jong ngi” bynrap u bah Rymbui.
 jong u snem 2026-27, ong u Myntri ka Tnad Pule Puthi ha ka sngi Ba-ar, haba ainam ia kane ka jingkiew bala khmih lynti sha ki jingpynkylla kiba la leh ha kine ki phra snem bala leit noh.){kind=link}