Shillong, Jylliew 09: Ki nongleit nongwan ha shilynter ka surok Laitlyngkot-Lyngkyrdem kin mad ïa ka jingshah khang iaid lynti kaba man ka sngi naduh ka 11 tarik Jylliew namar ba ka Sorkar kan pynsdang ïa ki jingtei ba hap pyndonkam ia ki mashin kiba heh ha ki bynta ka Chainage Kms 24+00 to 34+00.
Ka jingpynbna u Sub-Divisional Officer, Pynursla Civil Sub Division, ka ong ba ïa kane ka jingkhang ban iaid lynti ka dei kaba la leh na ka bynta ka jingbit jingbiang jong ki paidbah, ban ïada na ki jingjia aksiden bad ban ïaid beit ïaid ryntih ki jingpyntrei ia ka surok.
Kane ka hukum ka dei ka jingbteng ia ka hukum kaba la pynmih ha ka 21 tarik Jymmang, 2026.
Kane ka surok kan dang khang man ka sngi naduh ka por 10:00 mynstep haduh 4:00 Janmiet bad 10:00 mynmiet haduh 5:00 mynstep.
Ki bor pyniaid ki la iathuh ba baroh ki kali yn shah ban iaid na baroh arliang, Laitlyngkot bad Lyngkyrdem tad haduh ka por 10:00 baje mynstep bad hadien 10:30 mynstep yn khang biang ban ailad iaka company ba kian sdang biang ki kam shna surok.
Ka jingpynbeit kan long kaba shipor bad man ka sngi, bad kan dang treikam haduh da pynmih da kawei ka jingpynbna.
Namar ka jingsdang jong ka aiom lyiur, ka bor district ka la ai jingmut ïa ki nongleit nongwan ba kin long kiba husiar bha haba ki ïaid lyngba katei ka jaka. La kyrpad ia ki paidbah ban kiar na ki jingleit jingwan ki bym donkam ha ka por ne marsien dep slap bad ha ki por miet.
Ki kali ba donkam eh, kum ki kali kit nongpang, ki kali pynlip ding, bad ki pulit yn shah ban ïaid ha ki por ba khang, katkum ka jingpeit bniah ïa ka jingshngaiñ da ki bor pynïaid ha ka jaka.
Ki lah ban phone ha u number 9862251116 jong ki Pulit ka Pynursla Police Station na ka bynta ban ia pynbeit haka leit ka wan.
