Imphal, Jylliew 9: Ha ka jingpynkylla kaba khraw na ki kam rahbor hapdeng ki Naga-Kuki ba dang ïaid shakhmat, ka United Naga Council (UNC) ha ka sngi Ba-ar ka la mih shakhmat ban iarap pyllait ïa ki 14 ngut ki Kuki ba shah rahbor, kaba la pynmih pat ïa ka jingkyrmen na ka bynta ka jingwanphai biang jong ki hynriew ngut ki Naga ba dang jah rngai.
Ia kine ki nongshah rahbor la aiti sha ki bor pyniaid district, ki pulit bad ki bor pahara hadien ka jingiamir jingmut hapdeng ki seng bhalang Naga, ki nongialam shnong bad ki bor sorkar.
Haba pynbna ïa kane ka rai, u president ka UNC u Ng Lorho u la ong, ba ïa kane ka jingpyllait la ïalam da ka nongrim jong ka jingsngew para briew bad ka jingburom jong ka jaitbynriew Naga ïa ka hok longbriew manbriew bad ki kyndon jong ka pyrthei ne ka international norms.
“Ka PAC Council ka la tuklar bad iarap ban pyllait ia ki Kuki kiba shah rahbor namar ba ki Naga ki bat ia ka kyndon leh thma (war ethics), ki ain ka pyrthei bad ka hok longbriew man briew,” ong u Lorho ha ki nongthoh khubor.
U la ong ba kane ka sienjam kala wan ruh lyngba ka jingkular da u Myntri kam Pohiing ka sorkar pdeng u Amit Shah sha u Neiphiu Rio ba un pyrshang ban pynthikna ia kaei kaba long ba man ki 6 ngut ki Naga ba shah rahbor ki Naga.
Ka UNC ka la ong ba ki jingkyrpad na ki kynhun balang, ki seng riewlum, ki seng bhalang bad ki nongialam sain pyrthei ha kylleng ka thain shatei lammihngi, kynthup ia u Conrad K. Sangma ruh ki la don bynta ha katei ka rai.
Uwei na ki nongshah rahbor uba la shah pyllait, u Paotinkai Chongloi na ka shnong Kokhita, u la ong ba katei ka kynhun ka la sah haduh 27 sngi ha ka jingshah set jong ki Naga bad ki la shah leh bein bha.
“Ngi la ioh jinghikai kaba khraw na ki para Naga jong ngi.Ki la long kiba phylla ia ngi,” la ong u Chongloi bad bynrap ba la pynbiang ia ki da ki marbam, ki jain, ki jainkup bad kiwei kiwei ki jingdonkam ha ka por ba ki sah.
Ha ka jingkyrpad kaba pynlung mynsiem, u la kyntu ïa ki dkhot jong ka shnong jong u hi ban jubab da ka jingsngew para briew kaba kum kata bad ban pynthikna ban pyllait noh ïa ki hynriew ngut ki Naga kiba dang jah.
“Nga kyrpad ia ki briew jong nga ban shim jinghikai na ka jingbha bad jingstad jong ki bad ban pyllait ia ki hynriew ngut ki nongshah rahbor ki Naga khlem jingeh bad halor ki nongrim jong ka jinglong briew,” u la ong.
Kane ka jingeh ka la sdang hadien ba la iathuh ba 6 ngut ki riew Naga ki la jah rngai ha ka thain Senapati-Kangpokpi ha Manipur, kaba la pynmih ia ka jingsngewkhia kaba jur hapdeng ki sengbhalang Naga. Hadien kata, 14 ngut ki Kuki ki la wan hapoh ka jingpeit jong ki Naga volunteer bad ki sengbhalang, kaba la pynjur ïa ka jingïakynad hapdeng kine ki ar jaitbynriew.
Kane ka mat ka la pynlong ïa ki kynhun balang, ki kynhun riewlum bad ki nongïalam saiñ hima sima ha kylleng ka thaiñ Shatei Lammihngi, kiba la khot bunsien ïa ka jingpynsangeh bad ka jingïakren.
U Myntri Rangbah ka Nagaland, u Neiphiu Rio, u la pdiang sngewbha ia ka jingpyllait im da kaba shngain bad kaba long briew man briew ia ki nongshah rahbor jong ki Kuki da ka United Naga Council bad ki seng bhalang jong ka Naga, kum ka jingjubab ia ka jingkyrpad ba la leh da ki kynhun Balang ba la ialam da ka Baptist World Alliance.
 ha ka sngi Ba-ar ka la mih shakhmat ban iarap pyllait ïa ki 14 ngut ki Kuki ba shah rahbor, kaba la pynmih pat ïa ka jingkyrmen na ka bynta ka jingwanphai biang jong ki hynriew ngut ki Naga ba dang jah rngai.){kind=link}