Shillong, Jylliew 22: Uwei u Koidi ba hap ban shong along shirta jingim namar ka jingpyniap iala u jong u Kynum ha u snem 2018, ula ioh phet tuh hynne ka janmiet sngi balang na Jowai District Jail.
Une u Koidi ba kyrteng u Shiningstar Pala, ula shim kabu ia ka jingsynjor ka rukom ap pahara hapoh ka phatok bad ula ioh phet tuh ha ka por 2 baje janmiet, ong u Bah M Kharkrang, Inspector General of Prison.
Watla nga dang ap ban ioh ia ka kaiphod halor kane ka jingjia,hynrei ha ka jingtohkit ba malu mala la paw shai ba ka don ka jingkheiñ sting jong ki Nongtrei ka phatok, ula ong.
U Bah Kharkrang u pyntip ba ki bor pyniaid ka phatok kila ujor ejehar sha ki Pulit halor kane ka jingjia.
Kat kum ka jingiathuh jong u, u Shiningstar Pala ula shah kem bad shah pynngat ha ki jingpynsajia halor ka kam bymman ba u la leh ha u bnai Jylliew 2018.
U Shiningstar (uba dang kynjoh 19 snem ha u 2018), ula rahbor ia la u jong u Kynum ba dang 9 snem ka rta na ka shnong Umjalasiaw bad la rahbor ia u sha Karbi Anglong ha Assam.
Hynrei dei hadien ka jingshah kem, ba ula ialam lynti ia ki Pulit sha ka jaka ba bret ia ka metiap jong une u Khynnah kaba don ha ka shnong Laher ha West Karbi Anglong. Ka Iingkashari na Jowai kala pynngat ia une u runar ha ka jingpynsajia da kaba set along shirta jingim.
Ha u bnai Kyllalyngkot 2021, arngut ki koidi kila lait phet na kane ka juh ka phatok katba dang kit ia ki sha Jowai Civil Hospital.
Kine ki arngut ki koidi ki kynthup ia u Small Phawa uba la shah pynngat kam bymman hapoh ka POCSO Act bad u Kwall Laloo uba la pynngat kam bymman da ka IIngkashari halor ka jingpyniap briew ia kaba ym shym la lap satia ia ka metiap haduh mynta.
