Shillong, Nailar 20 : U Nongialam ka United Democratic Party (UDP) bad Myntri kam pohiing barim ka Jylla Bah Lahkmen Rymbui ha ka sngi Ba-ar, ula ong ba ki 12 ngut ki MLA ka party kin trei shitrhem ban pynkhlain ia ka party ha manla ki shnong ki thaw hashuwa ban wan ka elekshon MLA 2028.
Kane ka jingkren kala mih tang shisngi hadien ba lai ngut ki MLA ka Congress kila leit ban pyniasoh ialade sha ka Liang Synshar National People’s Party (NPP).
“Ka UDP ka dei ka seng riewlum bala rim tam bad ba heh tam ha Jylla. Baroh ki party kin pyrshang ban pynkhlain iala ka tynrai bad kun pyrshang ban pynbun iala ki briew ha Iingdorbar Thaw Ain. Kumta kum ka party, ngi ki 12 ngut ki MLA, ngin sa pyrshang ban leh eiei ha kaban pynkhlain ia ka party jong ngi ha ki shnong ki thaw khnang ba ngin iohi ba kumno kan long ha ka elekshon ban wan” ong u Bah Rymbui haba iakren bad ki nongthoh khubor.
Haba kylli ia ki sienjam bala shim ban khanglad ia ka jingpyrshang ban beh thong ha ka ban tan ia ki MLA ka UDP, une u MLA ka Amlarem ula ong “Ngan nym ong eh ia ka kyntien beh thong namar mano mano ba kwah ban leit sha kiwei ki seng, ka shong eh ha ka jingsngew shimet jong ki, ka dei ka rai shimet.”
U Bah Rymbui ula ong ba ka jingtynjuh kaba hakhmat eh ia ka UDP mynta ka dei ka jingpynkhlain ia ka ktem ha Ri-lum Garo.
.){kind=link}