Shillong, Jymmang 21: Ka Sorkar Meghalaya ka dang pynkhreh ban pynheh shuh shuh ia ka jingrep khlem pyndonkam dawai ne Organic Farming kaban kynjoh haduh 1 lak hektar, ia kane la ong da u Myntri ka rep ka riang u Timothy D Shira hynne ka sngi Palei bad ka ainam ia ki nongrep kiba la jam shaphrang ha kaban pyndonkam da ki bio-fertilizers bad ka jingioh jingkyrshan na ka Sorkar Pdeng.
“Ia kane kam rep ne ka Organic Farming kadei kaba la sdang da ka Sorkar” ong u Shira.
“Ym shim la ai ia kino kino ki dawa ne Chemical Fertilizers. Ki paitbah kila sdang kiar ban pyndonkam ia kitei ki Chemical Fertilizer. Kila pyndonkam da ki bio-fertilizers bad ia ka sboh”.
U Myntri ula kdew ba ka Lakadong Turmeric Cluster ka jylla kaba la pyniaid da ka Khadi Mission, ka long kum ka nuksa jong katei ka jingkylla kaba seisoh. “Dang shen nga la leit jurip ia ka jaka kaba pyniaid da ka Cooperative Society. Kila leh bha” ula ong.
Ula ong, ba ka jingtreikam ki Cooperative kala nang pynbha ia ka jingioh kamai ki nongrep bad ka lad ban pyniaid ha ki iew ki hat.
“Ha ki por kiba mynshwa, ki nongrep ki hap ban rah ia ki jingthung ki jongki sha ki iew ki hat hynrei mynta kim donkam shuh ban leit sha iew sha hat” la batai u Shira. “Mynta ki wan sha ki Cooperative Society, ki siew ha ka dor kaba biang bha bad kila leh lut ia ki kam ban song, ban pynkylla sha u Powder ne bani bha ia u Turmeric ne Shynrai bad la shalan sha kiba bun tylli ki ri”.
Ha kaba iadei bad ka jingbuh thong na ka bynta ki snem ban wan, u bynrap “Ka Sorkar kala don ia ka policy. Mynta da ka jingiarap ka Sorkar Pdeng, ki unit ki bapher bapher- un shimkhia ban leh ia ka Organic Farming ha ka jaka kaba don 1 lak hektar. Ngi lah shimkhia ha ki 60,000 hektar, kumta sa 40,000 hektar ka jaka yn sa sdang ban leh ia ka organic farming”.
Ha kaba iadei bad ka jingthung ia ki marrep kum u kba (staple crop), u Shira ula ong ba ka jinglong jingman jong ka suinbneng kadei kaba ym lah satia ban kyntiew shuh shuh.
“Ha ka jingrep ia u kba, kila pyndonkam ia ka juh ka rukom kaba rim wat haba kila pyrshang ban leh ban pynbha shuh shuh ruh kam long namar ka jinglong jingman jong ka suinbneng, kumta kim lah ban pynbha” ula ong.
Ula pynshai ruh halor ka jingsngewkhia halor ka jingduh noh ia ki jaka rep. “Ka jingmih jong ki sor kam shim la ktah ia ki jaka rep ha ka jylla” la ong u Myntri.
Ka Meghalaya kala pyniaid shakhmat ia ka jingrep kaba khlem pyndonkam dawai ne Organic Farming bad ka jingioh ia ka shap GI-Tag ia ki marrep kum u shynrai Lakadong uba long u bynta uba kongsam tam ban kyntiew ia ka kamai kajih bad ia ka jingshalan shabar.
