Guwahati, Nailar 13 : U Myntri Rangbah ka Assam Himanta Biswa Sarma ha ka sngi thohdieng, u la kyntu ïa ki paidbah ka Guwahati kiba mad ïa ka jingeh na ka jingshlei um ba kin ujor sha ka National Green Tribunal (NGT) na ka bynta ban khanglad ïa ka “jingtih lum pathar” jong ka skulbah University of Science and Technology Meghalaya (USTM.
Kane ka jingkyntu u Himanta ka la wan jia shisngi hadien ba u la pynpaw ba ka sorkar jong u kan leit mudui sha ka NGT pyrshah ïa ka skulbah shimet jong ka Meghalaya, kaba, u la kam, ka la tih pathar ïa ki lum ha ka campus jong ka, kaba la wanrah ïa ka jingshlei um kaba jur ha Guwahati.
“Namar ka jingtih lum pathar ha ka thaiñ Jorabat, ka jingshlei um ka la nang kiew ha Guwahati. Kito kiba kynthoh ïa nga ki dei ban kynmaw ba ka jingshlei um ka kham jur ha Dispur bad ki jaka ba marjan bad ka Jorabat, ban ïa kiwei pat ki bynta jong ka nongbah,” ong u Sarma haba ïakren bad ki nongthoh khubor.
Ka jingkynnoh jong u Sarma ka long pyrshah ïa ka University of Science and Technology Meghalaya (USTM), kaba la seng da u Mahbubul Hoque uba dei ruh u chancellor jong ka.
Kane ka University ka don ha ka thaiñ 9th Mile ha Ri-Bhoi district jong ka Meghalaya ba marjan ka Jorabat, kaba long kum ka jaka rung sha Guwahati.
“Ki briew kiba mad ia ka jingeh (ka jingshlei um) ki lah ban leit ujor sha ka NGT ban pynsangeh noh ia ka jingtih lum pathar ha Meghalaya”, ong u Himanta.
U Sarma u la ong ba ka sorkar jong u ka dang shim ruh ia ki lad ki lynti ban weng ia kane ka jingeh bad ka la thaw ia ka Committee jong ki riewshemphang, ka ban ai jingmut ia ki lad ki lynti ban pyntuid ia ka um ha nongbah Guwahati.
U Sarma ha ka taiew ba la dep u la kynnoh ba ka USTM ka la leh ïa ka “flood jihad” da kaba tih ïa ki lum ha ka jaka pule jong ka ban tei ïa ki jingtei thymmai kaba, u la kam ba ka dei “kawei na ki daw” jong ka jingshlei um kaba jur ha ka nongbah Guwahati, Assam.
