Shillong, Risaw 20 : U Nongialam ka BJP bad MDC ka Tura Bernard N Marak, ula kyrpad ia u Myntri ka Ministry of Tribal Affairs Jual Oram ba un tuklar lem halor ki jingeh ba iakynduh da ki samla pule ka Meghalaya ban ioh Scholarship.
Ha ka shithi bala phah sha u Oram ha ka sngi U Blei, u Bernard ula ong ba ki samla pule kiba dei na ki Scheduled Tribe (ST) ka Meghalaya, kila mad ia shibun ki jingeh ban aplai ia ka scholarship namar la bthah ia ki ban ioh ia ka Income certifictae bad affidavit na ki bor Sorkar ha ka jaka jong ki Autonomous District Council (ADC) kiba dei khmih ia ka ST.
“Ka Income certificate bad affidavit ba ai da ki ADC ka dei ia kaban pdiang na ka bynta ki samla pule ST ha ka jaka jong ki kot ki slab a ai da ki bor Sorkar kiba mihkhmat ia ka Jylla” ula ong.
Une u MDC ula kdew ruh ba ki samla pule kila pynpaw ia ki jingeh halor ka jingjynjar ba ki mad bad ka jinghap pynlut bun ka pisa ha kaban aplai namar ba ki hap iaid lyngba ki cyber café khamtam lei ki samla pule kiba wan na ki longiing baduk.
Ula ong ba bun ki samla pule kila ujor ba ka scholarship jong ki, kala sahteng naduh u snem bala lah.
“Halor kane, nga kwah ban kyrpad ia phi ban khmih lem kham kyrkieh ia kane ka kam, haba khmih ia ki jingeh jong ki samla pule ST. Ngan ai khublei shibun lada phi lah ban ai jubab sha nga kham kloi haba kular ba ki kot ki sla kum ka income certificate, affidavit bad kiwei, kin dei kiba ai da ki MDC/ADC ia ki samla pule ST kiba aplai ia ka scholarship” ula ong ha ka shithi.
U Bernard ula kyrpad ruh ia u Myntri ka Sorkar Pdeng ban pynjlan shuwa ia ka sngi khatduh ban aplai ia ka scholarship jong ki samla pule ST.
