Shillong, Risaw 14: Ka Khasi Student Union (KSU) Mawphlang Unit hynne ka sngi kala phah tuklar ha u Myntri ka tnat Pule Puthi u Bah Lahkmen Rymbui ban pynbeit iaki jingeh haba iadei bad ka Science and Commerce College Mawphlang.
Haka dorkhas ka KSU kala pyntip ba haka 3 tarik Nailur ka seng kala pynlong ka jingjurip ha Science and Commerce College Mawphlang bad kala shem shibun ki jingduna hapoh kane ka jaka pule kaba dang shu plie thymmai.
Ka KSU ka dawa na u Myntri ba donkam ban pynbiang daki bos ia ka College bad kali namar ki samla pule, ki nonghikai wat ki nongtrei ki donkam ban iaid ym duna 2.30 km na surok bah ban poi sha Science and Commerce College Mawphlang.
Ka seng kala dawa ruh na u Myntri ban shimkhia ha ka ban pyntreikam noh iaka Laboratory khnang ba ka jingpule jong ki khynnah kan nym long kaba dkoh.
“La donkam ban shna noh ia ki almari buh kot bad kumjuh ruh ban pynbiang noh ia ki kot kiba dei ban buh hapoh ka ‘Library khnang ba kan long ka jingmyntol la ki samla pule jong kane ka kolej, khamtam ia kito ki samla kiba wan na ka longing kaba kham duna ha ka ich ka kot. Nalor kata ki samla pule ki donkam ruh ia ki ‘wifi hapoh Library ba kin ioh ban wad bniah bad pyniar ia ka jingnang jingtip kat kum kane ka juk ba mynta khnang ban ja ryngkat dor bad kiwel pat” la ong ka KSU.
Ka KSU ka dawa ruh ban pynioh noh ia ka ‘Bording’ hapoh ka campus bad ha baroh ki kamra klas bad kumjuh ruh ban pynioh noh iaka Um’ hapoh ka kolej ryngkat bad ka jaka pynglang um na ka bynta ka um bam um dih kaba khuid kaba suba.
Haba iadei bad ki nonghikai, ka KSU ka dawa ban thumung kam pura noh ia ki nonghikai bad ki nongtrei ophis hapoh ka College ba ka dawa ruh ba ka jingthungkam kadei ban long kaba janai bad ba paka, bad kan kyntiew ruh ia ka jingnang jintip jong ki samla pule.
Ka KSU ka dawa ba dei ban shna pyndep noh ia ki ‘Hostels’ khnang ba ki samla pule kiba wan na ki jaka kiba jngai bad kumjuh ruh ia kito ki ba wan na ki longing ba duna ka ioh ka kot kin nym shem jingeh ha kaba siew bai wai ing kumba long mynta.
Nalor kane ka ka KSU ka dawa ruh ban shna pynbha bad siang noh ia ka madan kaba don ha phyllaw jong ka College khnang bad ban shna bad pynioh ia ki ‘Madan lalehkai kum ki Madan Basketball, Football bad Volleyball khnang ba ki samla pule kin ioh ban ia shim bynta ha ki sports.
 Mawphlang Unit hynne ka sngi kala phah tuklar ha u Myntri ka tnat Pule Puthi u Bah Lahkmen Rymbui ban pynbeit iaki jingeh haba iadei bad ka Science and Commerce College Mawphlang.){kind=link}