Shillong, Jylliew 06 : Ki bahaiing u Raja Raghuvanshi, ia kaba ka met la ioh tam dang shen na riat Sohra hadien ka jingjah rngai bad ka kurim, kila thoh sha u Myntri Rangbah Duh ka Ri Narendra Modi ba phah tuklar ban tohkit da ka Central Bureau of Investigation (CBI) ia kane ka jingjia.
Kat haduh mynta, ki Pulit ka Jylla bad ka kynhun Search & Rescue, kim pat lapdien satia ia ka kurim u Raja, ka Sonam Raghuvanshi, kaba la jah rngai naduh ka 23 tarik Jymmang.
U Raja bad ka Sonam kila wan sha Meghalaya ban leh honeymoon hadien ka jingdep kyntiew kurim ha ka 11 tarik Jymmang. Kine ki shijur kila iakren khadduh bad ki bahaiing ha ka 23 tarik Jymmang, kajuh ka sngi ba lip syndon ka phone.
Ki Pulit ka Jylla kila sdang ia ka jingwad ia kine ki shikurim hadien ka jingioh jingtip ba ki jah rngai ha Sohra bad dei ha ka 2 tarik Jylliew, ba kila lap ia ka metiap u Raja na ka riat ba jylliew ha Sohrarim. Ka jingwad ia ka Sonam ka dang iaid haduh mynta.
U Hynmen u Raja, VipulRaghuvanshi, ula ong “Ngi la dep phah ia ka shithi sha ka Ophis u Myntri Rangbah Duh ka Ri lyngba u Commissioner, ba dawa ban phah tohkit ha ka CBI. Ngi kwah ia ka jingbishar ba hok ia u Raja bad kyrmen ba kan iarap ruh ha kaban lapdien pat ia ka Sonam”.
Kine ki shikurim kila mih na Indore ban wan sha Shillong ha ka 20 tarik Jymmang. Ka jingjah rngai jong ki bad ka jinglap ia ka metiap u Raja, kala pynkyndit ia baroh, kaba la pynbor ia ki bahaiing ban phah tuklar ha ka Sorkar Pdeng.
