Shillong, Nailar 06 : Ka Synjuk ki Khlieh Nongsynshar Shnong Mawsynram C&RD Block, ha ka sngi Balang, kala kyntu ia u Myntri Rangbah Conrad K Sangma ba un tuklar lang ha kaban kyntiew kyrdan noh ia ka Mawsynram C&RD Block sha ka Civil Sub Division da kaba kdew ia ka jingdonkam ban wanrah shajan ia ka jingshakri ka Sorkar sha u paidbah.
“Ka jingdawa ia ka Mawsynram Civil Sub-Division ka dei kaba la don 20 snem mynta. Hynrei haduh mynta, kam pat shym la urlong bad kumta ka dei ia ngi ban buddien ia kane ka kam haduh ba kan da urlong” ong u Chairman ka Synjuk Bah Hiamdor Rapsang ha ka shithi bala aiti sha u Myntri Rangbah.
“Nalor kata, naba ka Civil Sub-Division ka dei tang ma ka, ka lynti ban wanrah shajan ia ka jingshakri ka Sorkar ia u paidbah bad namar ba kane ka Sorkar Meghalaya Democratic Alliance (MDA-2) hapoh ka jingialam jong phi kala ong ba ka dei ka Sorkar u paidbah, ngi don ka jingngeit kaba khlain ba ka Sorkar joong phi kan sngap bad pynurlong ia ki jingdawa jong ki nongshongshnong ka Mawsynram khlem da bun ia kano kano ka kyndon namar ka thain ka dei kaba la don lypa ia ki Ophis bapher bapher ka Sorkar bad kiwei kiwei ki jingdonkam kiba donkam ban kyntiew kyrdan sha ka Civil Sub-Division” ula ong.
U Bah Rapsang ula pynpaw ruh ba ka Synjuk kala ai ruh ia bun bah ki daw ban pynksan ia ka jingdawa, kynthup ka rta jong ka Block (seng naduh u 1962), ka jinglong ka jaka, ka jingdon ki nong shongshnong (kumba 65,000) bad ka jingbym biang ki lad pyniasoh. Ka Block ka shakri ia palat 144 tylli ki Shnong.
Ka jingjngai bad ka jingbym biang ki lad pyniasoh haba phai sha ki surok bad kiwei kiwei ki lad, ki dei ki daw bah ba buh jingeh ban pynpoi ia ka roi ka par bad kumta ka pynksan ia ka jingshisha ba donkam ban wanrah shajan ia ka jingshakri ka Sorkar sha ki paidbah.
Ka jingkyntiew kyrdan la khmih lynti ba kan pynsuk ia ka jingim ki nongshongshnong, khamtam kito kiba sah ha ki jaka khappud bad da ka jingwanrah shajan jong ki ia ka jingshakri, kan pynkutnoh ia ka jinghap ban wan ha ka lynti kaba jngai ban pyndep wat ia ki kam barit barit.
