Shillong, Nohprah 15: Ka Khasi Students Union (KSU) hynne ka sngi Thohdieng, kala dawa naka Myntri ka tnat ka koit ka khiah Kong Ampareen Lyngdoh ban tuklar halor ka jingujor ba don ki samla trai Ri kiba hap ban leit thoh eksamin shabar Meghalaya naka bynta ka kam Group B & C kiba lait hapoh ka North Eastern Indira Gandhi Regional Institute of Health & Medical Sciences (NEIGRIHMS).
“Ngi dawa ba phin tuklar lem halor ka eksamin thepkam Group B & C ha NEIGRIHMS namar la ioh jingujor ba ki samla trai Ri ki hap ban leit thoh eksamin shabar Meghalaya” ong u general secretary ka KSU samla Donald V Thabah lyngba ka shithi shaka Kong Ampareen.
U samla Donald ula pyntip baka KSU kala pyrshang ban iakynduh iaka Myntri ka tnat ka koit ka khiah hynrei la ioh jingtip ba kam don ha Nongbah bad kila ioh ban iakren noh lyngba ka Phone.
Ula iathuh ba ka Myntri ka tnat ka koit ka khiah kala kular iaka KSU ba kan iakren bad u Myntri Rangbah ka Jylla u Conrad K Sangma halor kane ka mat.
“Kala kular ba kan pyrshang ban kynduh ruh ia ki ophisar ka tnat ka koit ka khiah ka Sorkar Pdeng ban pynbeit ia kane ka jingeh bad ban kyntu ban shah iaki samla trai Ri trai muluk ban thoh noh iaki eksamin hapoh ka Jylla” ula ong.
U samla Donlad ula pyntip ruh ba shen ka KSU kan sa iakynduh ia u Myntri Rangbah ka Jylla ban phah tuklar halor kane.
Nalor kane ka KSU kala thoh sha u Director ka NEIGRIHMS u Dr Nalin Mehta ban pynbeit halor kane ka jingeh ba ki samla ka jylla ki kynduh.
“Ka seng ka sngew ba kane ka jingbym ioh thoh eksamin ki samla trai Ri trai muluk hapoh ka Jylla la dei ban pynbeit noh mardor bad dei ban shah iaki samla ban thoh eksamin hapoh ka Meghalaya” la ong ka shithi sha u Dr. Nalin Mehta.
Ka shithi naka seng ka pynkynmaw ba naka liang u Dr Nalin Mehta haka jingiakynduh bad ki nongialam ka seng ula pyntip iaka jingpyniaid iaka eksamin la aiti sha kawei ka Company HLL hynrei ki jaka thoh eksamin kidei ha Shillong, Guwahati, Jorhat & Delhi.
Ia kane ka HLL agency la jied halor ka jinglah ban pyniaid iaki eksamin.
“Hynrei ka seng kala jingujor ba don ki samla trai Jylla kiba hap ban leit thoh eksamin sha Dibrugarh haka17 & 18 Nohprah bad la ioh jingtip ruh ba kat kum ki jingpynbna laitkam, ki samla ki lah ban jied iaka jaka thoh eksamin ha Shillong, Guwahati & New Delhi” la ong ka shithi.
“Ki bun ki samla trai Ri trai muluk kiba la jied iaka Shillong bad iaka Guwahati kum ki jaka thoh eksamin hynrei ki ioh pynban sha Dibrugarh bad kane ka paw shai ka jingbym lah ka Company HLL ban pynbeit iala ka jingbakla kaba buh jingeh iaka lawei ki samla trai Jylla”.
Ka KSU ka pynkynmaw ba bun ki samla kiba mut ban ialeh iaki eksamin kidei naki longïing ba duna iaka ioh ka kot ba ka jinghap leit thoh iaki eksamin sha bar Jylla ka buh jingeh bha iaki.
“Namar kane ka KSU ka ban jur ba dei ban pynbeit noh ia kane ka kynrum kynram katba kloi” ula ong.
Nalor kane ka KSU ka pynkynmaw ba ia u Director iaki jingkular ban pynlong daka Survey ia baroh ki Computer Centres ha Shillong naka bynta ban pynlong iaka eksamin thepkam lyngba ka juk CBT System Examinations.
