SHILLONG, Nohprah 10: Ka Khasi Student’s Union ( KSU) kala phah tuklar lang ha u Myntri Khynnah ka Social Justice & Empowerment A Narayanswamy ban kynthup lang ia ki samla pule Schedule Tribe (ST) ha ka Dr Ambedkar Centre of Excellence (DACE) scheme ba pyntreikam da ka North Eastern Hill University (NEHU).
U Chairman ka KSU Education Cell Raymond Kharjana ha ka shithi sha u Narayanswami ula ong “Nalor kane, ka Union ka sngew nan aba ia ka Tribal Development Division la phiah ban thaw ia ka Ministry of Tribal Affairs ha u Risaw 1999, ka bha ka miat jong ki jaidbynriew ST kam hap shuh ha ka Ministry of Social Justice & Empowerment, hynrei ka Union ka kwah ban buh hakhmat ia kane ka jingkyrpad hakhmat ka Ophis jong phi ban ailad ha kaban kynthup lang ia ki samla pule ST ba kin ioh bynta ha ka DACE skhim ha NEHU bad kane kan pynthikna ia ka jingiohlad ba kyrpang jong ki samla pule ST jong ka Jylla Meghalaya ban ioh ia ki jingai jinghikai ba kyrpang ba khlem ka jingsiew n aka bynta ki eksamin Civil Service”.
Ha ka 22 tarik Iaiong mynta u snem, ka Dr Ambedkar Foundation (DAF) jong ka Ministry of Social Justice & Empowerment kala pyntreikam ia ka Dr Ambedkar Centre of Excellence (DACE) ha ki 31 tylli ki Central University ha kylleng ki jaka hapoh ka Ri.
Ka DACE ka dei kaba la wanrah ban ai ia ka jinghikai ei ia ki samla pule Scheduled Caste ba kin ialeh ia ki eksamin Civil Service, ba pynlong da ka Union Public Service Commission (UPSC) bad ha ka 23 tarik Jymmang, ka NEHU kala soi ia ka MoU bad ka DAF ban pyntreikam ia ka DACE skhim hapoh ka Campus.
U Bah Kharjana ula ong namar ba ka Meghalaya ka hap hapoh ka Sixth Schedule jong ka Riti Synshar ka Ri, kiba bun na ki nongshongshnong ha Jylla ki dei ki Scheduled Tribe bad ka NEHU kadei kaba la seng ha u snem 1973 bad ia mynta ka jingtreikam ka long tang hapoh u pud u sam jong ka Jylla Meghalaya.
Une u Nongialam ka KSU ula ong ba ka Seng ka pynpaw ia ka jingsngewnguh ia ka Ministry bad ka Foundation halor ka jingshimkhia ia ki jaidbynriew SC da kaba pyntreikam ia ka skhim ka ban iarap ia ki samla na ki jaidbynriew SC ba kin iakhun ia ki eksam Civil Service.
Hynrei, ha ka 25 tarik Jymmang, ka KSU lyngba ka shnat treikam ha NEHU kala phah ia ka jingthoh sha u Vice Chancellor ka NEHU ba kyrpad ia u ban pan ia ka jingbit n aka Ministry bad ka Foundation ba kin shah ha kaban kynthup lang ia ki samla na ki jaidbynriew ST ka Jylla Meghalaya ba kin ioh bynta lang ha ka DACE hapoh NEHU, namar ka jingbym don ki jingdonkam bad jingiaral kaba lah ban ai jinghikai ia ki samla ka Jylla ba kin iakhun ia ka eksam Civil Service ba pynlong da ka UPSC.
Ula ong ba dei namar ka jingbym don kine ki lad ai jinghikai, naduh u snem 2013 ym shym la don shuh uwei ne kawei ruh ki Ophisar IAS/IPS na ka Jylla kiba dei na ki jaidbynriew ST.
Ha kajuh ka por, u Nodal Office ka DACE-NEHU ha ka 12 tarik Nailur, ula thoh sha u Dr Vikas Trivedi, Director ka Dr Ambedkar International Centre, Ministry of Social Justice & Empowerment ka Sorkar India ba kyrpad ia u ban ai jingbit lem ha kaban shah kynthup ia ki OBC bad ki ST namar ba don tang 30 ngut ki samla pule SC kiba la shah jied ha ka DACE-NEHU hynrei haduh mynta ym pat shym la don ka jingai jingmynjur ban kynthup ia kiST & OBC ha ka DACE-NEHU.
