Shillong, Nohprah 10: U National spokespersons ka All India Trinamool Congress (AITC) Saket Gokhale hynne ka sngi u la ujor daka ejahar pyrshah ia u Symbud Myntri Rangbah ka jylla bah Prestone Tynsong namar ka jingkynthoh ba u dei uba “Shiteng Khlieh”.
Kane ka jingujor ejahar kadei halor ka jingkam u bah Prestone Tynsong ba u Saket Gokhale udei u briew u bym biang khlieh namar la bunsien u la donkti ban kynnoh ba ka sorkar Meghalaya ka donkti ha ki kam bamsap.
Naka liang u Saket Gokhale u la ujor daka ejahar pyrshah ia u bah Prestone hapoh ka ophis treikam u Superintendent of Police (SP) ka East Khasi Hills u bah Sylvester Nongtnger.
Haka ejahar, u Gokhale u la pyntip ba haka 6 tarik mynta u bnai u Symbud Myntri Rangbah ka jylla bah Prestone Tynsong u la kynnoh ba Saket Gokhale udei u briew u bym biang khlieh bad dei namar kane donkam ban pynshitom ia u bah Prestone Tynsong katkum ki kyndon u/s 499 jong ka IPC.
Une u Nongialam ka AITC u la kyntu ia u SP ka East Khasi Hills ban leheiei noh kham kloi pyrshah ia u Symbud Myntri Rangbah ka jylla bah Prestone Tynsong.
