Shillong, Rymphang 19: Ka Employment Monitoring Cell jong ka Khasi Students Union hynne ka sngi Balang kala iakynduh ia ka Director General of Police (DGP) ka jylla Kong Idashisha Nongrang ban phah tuklar ban khmih biang ia ka Office Memorandum kaba la pynmih haka 1 tarik u Nohprah 2023, kaba ailad ia baroh ki kyrtong kiba la pyndep (pass) ia ka Physical Efficiency Test (PET) ban ialeh sa ia ka eksamin ka ban long halor ka jingbhah 1:20 katkum ka jinglait kam.
Ha ka shithi kaba la aiti sha ka DGP ha ka jingialang, u Chairman ka Employment Cell ka KSU u samla Rueben Najiar ula ong, “Ngi kyrpad ia phi ban khmih biang ia ka Office Memorandum ka Tnad Home (Police) Department, ba 1 tarik u Nohprah 2023 kaba don ia u nombar HPL.231/2023/60”.
Ula ong ba ka mat kaba ka seng ka kwah ban pynsngew ka long kaba la kdew ha ka Para. 18.1 kaba ong, “Ka jingdon baroh jong ki kyrtong kiban shah khot ban ialeh ia ka eksamin ka dei ban long 20 sien na ka jingdon jong ki kam kiba lait ka ban leit sha ki kyrdan jong ki kyrtong katkum ka Reservation Policy jong ka sorkar jylla”.
“Ka seng ka don ia ka jingsngew ba dei ban ailad ia baroh ban thoh ia ka eksamin kiba la pass ia ka Physical Efficiency Test (PET) bad kam dei ban long kat kum ka Ratio 1:20 na ka jingdon ia ki kam kiba lait. Kum kane ka rukom pyniaid ia ka kam, kan long tang ban ioh pyndap ia ka kam ban ia kaba jied ia ki kyrtong kiba tbit tam bad ka lah ruh ban lam sha ka jinghiar jong ka kyrdan namar kiba tbit bha ki lah ban shah kyntait noh tang da kaba bud halor ka jingbuh ia ka Ratio. Ka jingbuh ia ka Ratio 1:20 ka lah ban long ka bym pat biang na ka bynta ki jinglong jingman baroh bad ki kyrdan kiba la dep ban ai da ka jingpynbna paidbah namar ki post ne kyrdan bapher ha ka kam pulit ki donkam ia ki sap ki phong kiba iapher bha” ula pynpaw.
Ula ong ba ka KSU ka pdiang ba ka PET ka long kaba kongsan hapoh ka tnad Pulit hynrei ha kajuh ka por donkam pat ban khmih lang ia kiwei kiwei ki bynta ruh.
“Katkum ka memorandum, ki Marks kiba ioh na ka jingthoh eksamin bad ki Marks kiba ioh na ka PET kidei kiba iapher bak la bak bad ka long ka bynta kaba kongsan bha na ka bynta ban jied ia ki post ne kyrdan, kum ka nuksa, ha ka kam UB Constable ka marks baroh ha ka PET ka long 100 bad ha ka jingthoh eksamin ka long 300, kumta u briew uba shu ioh ia ka marks tang ban shu pass ia ka PET u lah ban shah jied ban ialeh ia ka Personal Interview lada U ne Ka ki leh bha ha ka jingthoh eksamin bad ka jingshisha ka long ba dei ban banjur bha ha kaba iadei bad ka jingthoh eksamin na ka bynta katei ka post ka pyni ia ka jingshisha ba ka jingjied kadei kaba la pynshong nongrim ha ka jingdon ia ka jingstad bad iaka jingdon ia ka sap, kumta ka jingjied ia ki kyrtong katkum ka Ratio 1:20 na ka PET ka long ka bym shongnia.”
U Reuben Najiar ula pynpaw ruh ba katkum ka jingpynbna paidbah ha ka 6 tarik u Lber 2024, ki don baroh 2968 tylli ki Post ha ki kyrdan bapher bapher bad ki bor kiba dei khmih kila dep ban pynlong ia ka PET ha u bnai uba la dep.
“Ka KSU ka kwah ban pynpaw ia ka jingbun jong ki samla kiba khlem kam khlem jam ha ka jylla, kala nang kiew bha bad ka jingkhmih lynti jong ki samla haba mih ki jingpynbna paidbah jong ka jinglait kam ka long kaei kaei kaba ym lah ban thew bad ka jingbym ailad pat ia ki ban shah thungkam wat haba kila pyndep ia ka PET ka long ka jingleh kaba sniew bad kaba pynduh mynsiem. Ka seng ka kyntu ba dei ban ailad ia baroh ki kyrtong kiba la pyndep ia ka PET ban ioh lang ia ka lad ban thoh eksamin lyngba ka rukom thungkam kaba iaid ha ka lynti kaba dei” la pynkut ka KSU.
