Shillong, Jymmang 13 : U Myntri ba khmih ia ka Tnad Community &Rural Development AT Mondal hynne ka sngi Nyngkong, ula pyntip ba ula phah tuklar ha ka Ministry halor ki jingeh kiba mih na ka jingpyntrei ia ka Mahatma Gandhi National Rural Employment Guarantee Scheme (MGNREGS).
Haba iakren bad ki nongthoh khubor, u Mondal ula ong “Nga la dep phah ia kawei ka shithi ba kdew ia baroh ki jingeh kiba mih. Ngi kyrmen ba hadien ka elekshon, yn sa pynbeit noh ia baroh kine ki jingeh”.
Haba pynpaw ba ka rukom pyniaid ia ka jingsiew ka dei kawei na ki jingeh kaba khraw duh, ula ong “Kane kala pynmih ia shibun ki jingeh ia ngi naba bun ki nongbat jobcard kim shym la pyniasoh ia ka Job card bad ka Aadhaar. Mynta ka Sorkar India kala pynlong kongsan ba baroh ki nongbat job card ki dei ban pyniasoh bad ka Aadhaar”.
“Ngi kyrpad ia u Myntri Rangbah ba un thoh sha u Myntri ba dei khmih bad ula dep ban thoh ia ka shithi bad dang shen nga ruh nga la thoh biang sha u. Kane ka dei kawei ka jingeh kaba ngi hap ban leh eiei tad haduh baroh ki nongbat job card kila dep pyniasoh bad u Aadhaar” ula ong.
Haba iadei bad ka pisa bai tiar, u Mondal ula ong “Ngi ju pyllait ia ka bhah jong ngi hapoh ka por bala buh hynrei ka shong ba kumno la pyllait ia ka pisa na Delhi. Mynta ka elekshon kala iaid arbnai kumta kala eh bha ban iakren bad ka Delhi ruh.”
.){kind=link}