Shillong, Jymmang 13: Ka Sorkar Jylla kala rai ban pynlong ia ki artylli ki degree college ha Ri-Bhoi bad East Garo Hills kiba treikam pura noh mynta u snem.
Haba iakren bad ki nongthoh khubor, u Myntri ka tnad Pule Puthi Rakkam A Sangma ula pyntip ba ki building jong baroh artylli ki degree college-kawei ha Patharkhmah, Ri-Bhoi bad ha Rongjeng, East Garo Hills kila jan dep artad lait noh tang ki katto katne ki kam kum ka jingpynpoi um bad ka jingshna ia ka surok.
“Namar kata, ngi la rai ban pyniaid noh shakhmat ha kaban pynlong ia kine ki artylli ki college kiba treikam pura noh ha une u snem 2024 shakhmat” ula ong.
“Ngin sa thung noh mar mar ia ki Principal jong kine ki college hadien bala weng ia ka Model Code of Conduct hadien ka 4 tarik Jylliew. Ngin sa thung ruh ia baroh ki nongtrei kiba donkam ha kine ki college” ula bynrap.
Haba kylli, u Myntri ula ong ba kine ki degree college kin sdang shuwa ha ki katto katne ki tnat jong ka Arts Stream.
