Shillong, Jymmang 13 : Ka jingshna pynbha bad pynkhlain ia ka jingkieng Damsite ka lah ban dep noh hapoh ka taiew ba kut jong u Naitung hadien ba ka Indian Institute of Technology (IIT) Guwahati, kala ai jingmut ban siang beit da ka slap dewbilat ha ka lynti iaid.
Haba pyntip ia kane hynne ka sngi Nyngkong, u Myntri ka Tnad Bording AT Mondal ula ong “Ha ka taiew bala lah nga la leit ban jurip ia ka dam bad ka jingkylli kala mih la ia ka lynti iaid yn siang da ki bitumen ne ban pynkhlain da ka dewbilat. Ngi la iasyllok bad ka IITG bad ka IITG kala ai jingmut ba ngi dei ban siang beit da ka dewbilat namar kiba bun ki daw”.
“Namar kata, ngi la weng noh ia baroh ki bitumen na ka jingkieng bad ruh na ka dam kaba la dep biang. Ngin iaid noh mynta kat kum ka jingai jingmut ka IITG” ula bynrap.
Kat kum ka jingong jong u, ka jingrkhiangjong ka dewbilat ka lah ban shimpor kumba 28 sngi eiei.
Haba kylli, u Mondal ula ong “Ka plan ba nyngkong eh ka long ba ngin siang da ki bitunmen bad ban pyndep ia ka jingkieng hapoh ka por bala buh (Jylliew) hynrei namar ka jingmih ki jingdonkam ba thymmai, ngi hap ban rah biang ia ka por kham shadien”.
Ula bynrap ruh ba ki briew kiba iaid lyngba lyngba kane ka surok, kila mad ia shibun ki jingeh hynrei ki dei ban sngewthuh ba la leh ia kane ka kam na ka bynta ka jingbha jong ki.
“Ngin pyrshang ban pyndep noh hapoh u Naitung ne ha ka taiew ba nyngkong jong u Nailar” ula ong.
U Mondal u pyntp ba ka rta jong ka dam kala kiew sa kumba 20 snem hadien bala dep kane ka jingshna pynbha bad pynkhlain ia ka.
