Shillong, Nailar 04 : U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong, ula hukum ban thwet ia ki Nongialam ka Legal Rights Observatory (LRO) namar ka jingpyrshang ban pyniashrut pher Jaidbynriew hapoh ka Jylla Meghalaya.
Kane ka hukum kala mih hadien ba ka seng LRO dang shen kala pynmih ia ka video halor ka jingjia ba 24 tarik Naitung ha Mahadev Khola, kaba kynnoh ia ka KSU ba ka thombor ia ki nongleh niam, ki lyngdoh niam bad ki kynthei ha jaka mane Blei ki Hindu ha Mahadev Khola nalor ka jingkynnoh ia ka Balang Presbyterian.
Haba iakren bad ki nongthoh khubor, u Bah Prestone ula pyntip ba ula bishar bniah ia kane ka jingjia ba jia ha Mahadev Khola bad shem ba kane ka jingjia kala mih tang na ka jingiasngewthuh bakla bad ba kam don bynta eiei ruh em bad ka niam lane bad kano kano ka seng niam.
“Hynrei nga la iohi ha ki social media, ka LRO kala buh shibun ki jingkynthoh halor kane ka jingjia. Mynta, nga la dep bthah ia ka Tnad Pulit ban wad ia kine ki briew. Kiei kine ki briew? Ula ong.
U Bah Prestone ula pynpaw ruh ia ka jingartatien ba ki dkhot ka LRO ki dei ki Nongshongshnong ka India hadien bala bishar bha ia ki jingkynthoh jong ki ha ki rynsan social media.
“Nga la iohi ia ki jingkynthoh jong ki. Nga sngew ba kine (LRO) kim idei satia ki nongshongshnong ka India. Lada ki dei, kim lahban shu kynthoh mata madei kaba lah ban lam sha ka jingiashrut pher jaidbynriew, ka ban lam pat sha ka jingia kynad pher niam kaba don jingma bha” ula ong.
U Symbud Myntri Rangbah ula ong ba ki Pulit kila sdang ia ka kam bad wad ia ki nongialam jong ka LRO.
Lah ban kdew ba ka KSU kala ujor da ka ejahar pyrshah ia ka LRO halor ka jingleh ia ka kam ban pynsaphriang ia ka khubor lamler bad wanrah iaka jingiashrut pher jaidbynriew bad pher niam ha ka Jylla.
