Shillong, Nailar 20 : U Chief Electoral Officer ka Jylla Dr BDR Tiwari, ula phah ia ka show cause notice sha ki saw tylli ki seng sain pyrthei bala register hapoh ka Jylla.
Kine ki seng sain pyrthei ki kynthup ia ka Khun Hynniewtrep National Awakening Movement (KHNAM), Meghalaya Democratic Party (MDP), North East Social Democratic Party (NESDP) bad ka Regional Democratic Secular Congress (RDSC).
Ia kane ka notice la phah hadien ba ka Election Commission kalatyrwa ban weng noh ia kine ki seng sain pyrthei na ka thup ki seng sain pyrthei bala register namar ka jingbym iashimbynta jongki ha ki elekshon naduh u snem 2019.
Kat kum ka jingong ka Commission, kine ki seng sain pyrthei ki khlem pynieng kyrtong satia ha kino kino ki elekshon sha ki Iing u paidbah lane State Legislative Assembly lane ki elekshon shiteng samoi ha kine ki hynriew snem.
Shuwa ban leh eiei, ka Commission kala ai ka lad ia kine ki seng sain pyrthei ba kin ai jingthoh lane ka show case balei ba ym dei ban leh eiei pyrshah ia ki.
Kine ki seng sain pyrthei kin hap ban aiti da ka jingthoh ha ryngkat bad ka affidavit na u President lane General Secretary ryngkat ki kot ki sla ki ban kyrshan ia ka.
Ha ka notice, u Tiwari ula pyntip ba ka jingshong bishar la buh ban long ha ka 3 tarik Nailur,2025, kaba dei ban wan iashimbynta da u President, General Secretary lane ki khlieh jong kine ki seng sain pyrthei.
“Lada ym ioh jingthoh na kine ki seng sain pyrthei hapoh ka sngi kaba buh, yn niew ba kine ki seng sain pyrthei kim don eiei ban ong halor kane ka kam bad ka Commission kan sa pymih ia ka hukum kaba iahap khlem kano kano shuh ka jingphah ktien sha kine ki seng sain pyrthei” ula ong.
