Shillong, Iaiong 6: Ka Voice of the People Party (VPP) hynne ka sngi Palei, kala phah ia ka shithi sha u Myntri Rangbah ka Jylla Conrad K Sangma ba kyntu ia ka Sorkar ba kan khot ia ka Dorbar Kyrpang ka Iingdorbar Thaw Ain ka Jylla khnang ban ailad ia ki Dkhot ka Iingdorbar ba kin iatai halor ka jingdonkam ban bishar thymmai ia ka State Reservation Policy.
Naba u Myntri Rangbah u don shabar ka Jylla, u MLA ka Mawlai Bah Brighstarwell Marbaniang bad Nongialam ka VPP Dr Ricky Syngkon, kila aiti ia ka shithi sha ki bor khmih ka Chief Minister’s Office ha Secretariat.
Haba iakren bad ki nongthoh khubor, u Dr Syngkon ula ong ba ka VPP ka kwah ia u Myntri Rangbah ban khmih ia ka ishu halor ka Roster System bad ka State Job Reservation Policy kaba dei ka kam ba ktah jur ia ka Jylla bad kaba donkam ban hap iatai, isyllok bad shim ia ka lynti ban pynbeit.
“Nalor kata, ka IIngkashari High Court ha ka hukum jong ka PIL No.2 u snem 2023, ba 3 tarik Iaiong 2023, kala kren shai “Kine ki dei ki kam kiba bha eh ban ieh ha ka Iingdorbar bad ki bor Synshar ka Sorkar ban shim rai bad hadien bala dep shim ia ka rai, kan sa long laitluid ia ki Nongshongshong ba shah ktah ba kin buh jingkylli ia kane ka Policy kat kum ki kyndon ain” ong u Dr Syngkon.
