Kyntu ia baroh ki Seng Sain Pyrthei ban tuklar lang
Shillong, Naitung 11: Ka “Sur ki Nong Mawlai” hynne ka sngi nyngkong, kala dawa ia ka Sorkar Jylla ba kan sei madan noh ia ka kaiphod jingshem halor ka jingtohkit ia ka jingshah siat iap jong u Nongialam barim ka seng Hynniewtrep National Liberation Council (HNLC) Bah Cheristerfiled Thangkhiew.
Ka “Sur ki Nong Mawlai” ba kynthup ia ka seng Khasi Students Union (KSU), Federation of Khasi Jaintia & Garo People (FKJGP) bad Hynniewtrep National Youth Front (HNYF) jong ka Mawlai Circle, kila leit ai dorkhas ruh sha baroh ki Seng Sain Pyrthei ka Jylla kynthup naduh kiba don ha ka Liang Synshar bad Liang Pyrshah, ba kyntu ba kin kren eiei bad ban dawa lang ia ka Sorkar ban sei bad pynpaw paidbah noh ia kaei kaba mih na ka jingtohkit jong u Justice T. Vaiphei.
U Justice T Vaiphei uba khlieh ia ka Inquiry Commission bad ba dei ruh u Chairman ka Meghalaya Human Rights Commission (MHRC), ula aiti ia ka kaiphod jingtohkit ha ka 20 tarik Jymmang 2022 ha ka kti jong u Myntri Rangbah ka Jylla Conrad Kongkal Sangma.
U Justice Vaiphei ula pyntip ba ka shimpor ia u haduh hynriew bnai ban pyndep ia kane ka kaiphod jingtohkit hadien ka jingshong bishar haduh 20 sien kynthih.
U pyntip ba ka Commission kala shim sakhi haduh 12 ngut ki briew halor kane ka jingshah siat iap u Bah Cheristerfield Thangkhiew, kaba jia ha ka step synnia jong ka 13 tarik Nailar 2021 hala ka jong ka Iingsah ha Mawlai Kynton Massar.
“Ka jingsngap jar jong ka Sorkar ka pynsuba sniew ia ngi ki Sengbhalang namar kat haduh mynta la jan dap arbnai naduh ba ba une u Nongbishar ula aiti ia ka kaiphod halor ki jingshem bad jinglap na ka jingtohkit ba laitluid jong u” ong ka Sur ki Nong Mawlai ha ka kyrwoh.
“Pynban kaba sngew lyngngoh ka long ba naka liang ka Sorkar ka sngap man man pynban, kane ka pyni shai ba ka la bakla halor katei ka kam, kumta kila pyrshang ban buhrieh ïa kito kiba donkti ban aibor ïaki pulit ban siat klep ïa utei u Rangbah Nongïalam barim jong ka kynhun kieng atiar HNLC” kala bynrap.
Kane ka Kynhun ka la ong “Ko Sorkar phi la pan por 6 bnai kat haduh ban da dep ka jing tohkit da kaba kyntu bad kyrpad ïa ngi ban pyn sngewthuh ïaki paidbah ba kin long jai jai… ngi la leh ïa kata bad ngi la burom ïaka jing kyrpad jong phi, to burom lang ïa ngi mynta da kaba phin pynbna paidbah ïa ka kaiphod kaba mih naka jing tohkit”.
“Ka kyrwoh kaba shai na ngi kum kynhun sha ka Sorkar ka long ba ka Sorkar kan bat la ka kular kumba kala khlei hashwa ban thung ïa katei ka kynhun tohkit, lada na ka liang ka Sorkar kam sngap, naka liang jong ngi Ka Sur Ki Nong Mawlai ngin sa shim da kiwei pat ki sienjam” kala pynkut.
