Shillong, Naitung 11: Ka Meghalaya Democratic Alliance (MDA) Coordination Committee kan shong jingialang lashai ka sngi ba-ar ban iakren ha ka ban ai ia ka jingkyrshan kaba pura kum kawei ka kynhun, ia ka kyrtong ka National Democratic Alliance (NDA) ka Draupadi Murmu ka ban iakhun ia ka elekshon President ka Ri ha ka 18 tarik Naitung.
“Ka MDA kan sa shong jingialang lashai ka sngi ba-ar ban iakren halor ka kam elekshon sha ka shuki President jong ka Ri India” ong u Marcuise N Marak, Chief Whip ka Sorkar Jylla haba iakren bad ki nongthoh khubor.
Kat kum ka jingong jong u, ka jingthmu jong kane ka jingialang ka long eh ha ka ban pynthikna ba baroh ki Dkhot ka MDA kin iatylli kawei bad ban leit sha ka elekshon da kawei ka sur.
Halor ka jingpynpaw ki 5 ngut ki MLA ba shah sospon jong ka Congress ba ki lah ban pep iashimbynta ha kane ka elekshon, une u Chief Whip ula ong “Ngin sa iakren lashai bad ngin sa nang ban batai ynda la kut ka jingialang”.
Uwei u MLA ba shah sospon Bah Mohendro Rapsang ula ong “Ngi ki 5 ngut ki MLA ngim pat shim rai satia ia kane ka kam bad ngi dang ap ia I Kong Ampareen Lyngdoh kum i Nongialam ka Congress Legislature Party ban lum ia ka jingialang”.
Hynrei ula ong pat ba kum ki Dkhot jong ka Sorkar MDA, “Nga sngew dei ba ngin hap iaid lang bad ka rai jong ka MDA”.
Lah ban kdew hangne ba ki 5 ngut ki MLA ba shah sospon ka Congress –I Kong Ampareen Lyngdoh, Bah PT Sawkmie, Bah Mohendro Rapsang, Bah Kimfa S Marbaniang bad Bah Mayralborn Syiem, ki khlem leit iashimbynta satia ha ka jingialang wan pan jingkyrshan jong ka Draupadi Murmu ba long myn ha ka 6 tarik Naitung ha Orchid Lake Resort.
Haba kylli ia kane, u Bah Rapsang ula ong “Ka BJP ha ka jingshisha kala phah ia ka shithi khot sngewbha sha u Chairman ka MDA u ba la ai copy sha baroh ki Dkhot ka kynhun synrop, hynrei namar ka jingbym iabeit lang hapdeng jong ngi, ngi la rai ban pep iashimbynta”.
