Shillong, Naitung 11 : Ka Behdieñkhlam Festival, ka dei ka jinglehniam ba kyrpang jong ki Pnar kiba dang bud pyrkhing ia ka Niamtre bad ia kane ki la ju pynlong katkum ka jingkwah jong u Kynrad ne u Trekirot.
Ka jingrakhe ia ka Behdeinkhlam ka kynthup ia ki jinglehniam ba harukom bad kane hi ka pynpaw ia ka jingskhem ka jingngeit jong ki paidbah tang ha uwei u Blei uba ki ong U Blai TreKirot
Katei ka jinglehniam ba shisien shi snem jong ka Raij Jowai ka la sdang ha kane ka sngi ha kaba jan baroh ki longiing ki ju tyrwa bam ia ki long shwa man shwa ha ka jinglehniam kaba ki ong ‘Ka Siang ka Pha’ lane ‘Ka E Chyllap Chilliang’.
Katei ka jingtyrwa bam sha ki longshwa man shwa ka long kum shi bynta ka jingsngewnguh bad ka burom ia ki ia kaba la ju pynlong ha ka jaka ba ki khot ka ‘Yung Blai lane Kmai Yung’ da ki longkmie jong ka Kur.
Hadien kane ka jingtywa bam, ki nongshong shnong jong kato ka dong ba ju tip kum ka Khon Raij lane Chilliangraij ki mih ban leit shaw ia u Symbood Khnong na ka khlaw sha Iawmusiang bad buh pat ia u ha ‘Tre Kjat Loomooïung’ bad hadien ba la buh ia u SymboodKhnong ki wanphai noh sha ki iing ki sem jong ki.
