Shillong, Nailar 07 : Ka Iingkashari Meghalaya High Court ha ka sngi Balang, kala phah notice sha ki bor ba dei khmih haba iadei bad ka jingkyntait ai No-Objection-Certificate (NoC) ban pynlong ia ka jingiaid pilgrimage ki paid Hindu sha ka krem Mawjymbuin ha Mawsynram, East Khasi Hills District.
Ka Iingkashari kala bthah ruh ia ka Deputy Commissioner ka East Khasi Hills ban buh ia uwei u Ophisar ba don jingkitkhlieh, ban pyntip sha ki nongshah mudui ba kin wan hapoh ka Iingkashari lashai ka sngi.
Haba shong bishar ia ka mukotduma bala ujor da ka Yatra, u Justice HS Thangkhiew ha ka hukum ula ong “Phah notice sha ki nongshah mudui No, 6,7, bad 8”.
“Kat kum ka jingiohi jong ka Kashari, namar kane ka kam ka dei kaba hap phikir bha bad ba donkam ban shim rai kyrkieh bad khnang ban pynbeit noh ia ka kam, ka Deputy Commissioner ka EKH ka dei ban phah ia u Ophisar ban pyntip sha ki nongshah mudui No 6,7,8 ba kin don ha Iingkashari lashai ka sngi, ha ryngkat ka Deputy Commissioner bad u Superintendent of Police ka East Khasi Hills ha ka por 2 baje janmiet” ula ong.
Ka Yatra ka dei ka Society bala register, kala mudui ia ka mukotduma pyrshah ia ka jingbym ai NoC da ki nongshah mudui No 6,7,8 ban pynlong ia ka jingiaid pilgrim sha krem Mawjymbuin kaba don ha Mawsynram, kaba dei kajaka ba ju lehniam da ki Hindu.
U S. Jindal, u nongiasaid ain jong ka Yatra ula ong ba kane ka jingiaid pilgrim ka dei kaba ju pynlong manla ka por bad naduh u snem 2011, da ka jingthaw ia ka Society, la nang kham pynjanai bad pynbeit ryntih ia kane ka jingiaid pilgrim.
Une u Nongiasaid ain ula pyntip sha ka Iingkashari halor ka jingai NoC naduh u snem 2011 da ki bor District tad haduh u snem 2023 bad pyntip ba ka Dorbar Shnong ha jan baroh kine ki snem, ka ju ai beit ia ka NoC bad ki jingbit bad kat ki kyndon ba la buh, la ju bud thik pa thik da ki nongpyniaid ia kane ka jingleh niam.
Ula pyntip ba ha une u snem, watla ia ka jingai jingbit la dep ban ioh ha ka 27 tarik Jylliew, 2024 na ki bor District ha ryngkat ki kyndon ba ki nongpyniaid ki dei ban ioh NoC naka Dorbar Shnong Mawsynram. Hynrei haba leit pan NoC na ka Dorbar Shnong, kam shym la don satia ka jubab bad la ioh jingtip pynban lyngba ki lad pathai khubor ba kala kyntait ban ai NoC.
U Jindal ula pyntip ba ki riewngeit Hindu kim don satia ia ka jingmut ban pynlong jaka mane Blei ia kane ka jaka kumba la mih kot khubor bad ha baroh kine ki snem, ka kam ba ki leh ka long beit tang ka jingsynreit um ha u maw lingam bad kam don satia ka jingthmu ban ktah ia ka jingsngew jongno re jongno ne pynthut ne pynjulor ia kane ka jaka.
Kumta, ula kyrpad ia ka Iingkashari ban phah notice sha ki bor pyniaid District bad sha ki kynhun shimet bad ba dei ruh ban pynmih ia ka hukum halor kane ka kam.
