Shillong, Iaiong 18 : Ka Sorkar Jylla kala bthah ia ki skul ha ki katto katne ki jaka jong ka Ri-lum Garo ba kin khang khyrdep shuwa shipor namar ka jingsyllad ka lyer jingshit kyr-ang (heat wave), kaba lah ban buh ia ka jingshngain ka koit ka khiah ki Khynnah skul ha ka jingma.
Kane ka jingbthah kala mih na ka Tnad Pule Puthi ka Jylla bad la ong ba mynta ka jingphah khang ia ki skul kala treikam ha West Garo Hills bad ha South Garo Hills District, kiba shah ktah jur tam ha kane ka jingsyllad ka lyer jingshit.
Ia kane la pyntip da u Myntri ka Tnad Pule Puthi Rakkam Sangma uba la ong ba ki District kiba shah ktah jur eh ki dei ka West Garo Hills District.
Ula ong ba ka jingsyllad ka lyer jingshit kam shym la wan jia tang ha Jylla hynrei ha kylleng ki ri ka pyrthei bad ka jingkylla ka suin bneng kan ym tang tang ia ka jingshit hynrei wat ia ka jingkyrduh um.
Shuwa kane, ka Director of School & Literacy ka Sorkar Kong RM Kurbah, kaba kyrpad ia baroh ki DC ka Ri-lum Garo ban peitthuh ia ka jinglong jingman hala ki District na ka jingsyllad ka lyer jingshit.
Kane ka Heh ka Tnad pule puthi kala phah ia kane ka shithi hynne ka sngi ba-ar haba ban jur ba ki DC ki dei ban shim ia ki lad ki lynti ban pynthikna ia ka jingshngain ka koit ka khiah ki khynnah skul, ki nonghikai bad ki nongtrei.
Kala kyntu ia ki DC ban iasyllok bad ki District School Education Officer, Sub Divisional School Education Officer bad lada daw aka kam, ban khang khyrdep shuwa ia ki skul.
Haba pyntreikam ia kane ka hukum, u Deputy Commissioner ka West Garo Hills Jagdish Chelani, ula pynmih ia ka hukum hynne ka sngi ba bthah ia baroh ki skul sngi jong ka West Garo Hills District, ba kin khang khyrdep noh shuwa naduh ka 19 tarik haduh ka 21 tarik Iaiong, namar ka jingsyllad ka jingshit kyr-ang ka bneng.
Kane ka hukum kala treikam ia baroh ki skul kynthup naduh ki Lower Primary, Middle, Secondary bad Higher Secondary. Ula ong ba tang ki skul miet ki bteng ban plie kumba ju long.
“Namar ka jingshit palat ka suin bneng ha baroh ki jaka ka West Garo Hills bad ban pynthikna ia ka jingshngain bad ka bha ka miat ki khynnah skul, ki nonghikai bad ki nongtrei, uba soi hangne, ula pynbna ba baroh ki skul Primary, Middle, Secondary, Higher Secondary kin khang khyrdep noh ha ka por mynsngi (8 am haduh 3 pm) hapoh ka District naduh ka 19-04-2023 haduh ka 21-4-2023 . Ki skul janmiet/miet kin iai plie bad treikam kumba ju long” ong ka hukum bala pynmih da u DC.
Kat kum ka jingong jong u, ka jingsyllad ka lyer jingshit ha ka District ka dei ka kam kaba sngewkhia bha bad ym lah satia ban kiar ia ka jingma ban ioh ia ka stroke jingshit (heat stroke), jingring tyrkhong (dehydration), bad kiwei kiwei ki jingshitom ba ioh na ka jingshit ka bneng.
“Namar kata, kum ka sienjam ban iada, baroh ki bor khmih, kynthup u District School Education Officer, la bthah ba kin pyntreikam pyrrkhing bha ia kane ka hukum” ula ong.
La bthah ruh ba ia ka jingpyndih dawai wieh bala thmu ban leh da baroh ki jaka pule, dei ban pynlong noh ha ka 24 tarik u Iaiong. Ula ong ba kane ka hukum kan treikam mardor tad haduh da pynmih da kawei pat ka jingpynbna.
