Shillong, Iaiong 18 : Ka All Khasi Hills A’chik Federation (AKHAF) kaba don ia ka Headquarter ha Shillong, kala kynnoh ba ka don ka jingbamsap kaba jur bad ka jingshna torti ia ka surok Border Roads ha South West Khasi Hills (SWKH) da ka kompani M/s Dilip Paul & Son.
Kane ka surok ka dei ka project jong ka Central Public Works Department (CPWD) kaba sdang naduh ka shnong Bagli sha Maheshkhola.
U President ka AKHAF Clivestar Ch Marak ha ka kyrwoh, ula pyntip ba ka seng kala leit ban tohkit ia ka rukom shna ia kane ka surok bad kala lap dala ki jong ki khmat ia ka jingtrei torti bad siang rong nalor ki kam bamsap da kane ka kompani M/s Dilip Paul & Son company.
Ka surok CPWD ka dei kawei ka lad pyniasoh kaba kongsan bha ia ki paid nongshongshnong kiba sah ha ki jaka khappud khamtam eh ia ki shipai BSF kiba pahara ia ki jaka khappud baroh arphew saw kynta manla ka sngi.
U Clivestar ula pyntip ba ha ka jingtohkit ia ka project, la kynnoh ba ka contractor (company) kam shym la bud iaki kyndon ban shna bha (quality standard) ia ka surok.
“La pyndonkam da ki mar kibym bha (low quality) ha ka jingshna ia ka surok bad nalor kata, ka jingrben jong ka rong ruh kam kot wat ia shi inchi. Kane kan ym pynshan slem ia ka surok nalor ban kyrda ia ka jingkit ba khia, kaban lam sha ka jingjot noh ki bynta ka surok shuwa ban lah pyndep pura ia ka. Kane ka dei ka kam bamsap bad ka seng kan ym long satia tang ka nongpeitkai ia kane ka bamsap” ula ong.
Ka AKHAF ka dawa ia ka contractor jong ka prokect ban leit mih sha ki jaka ba dang pyntrei bad ban ai jubab ia ka seng balei ba kam shym bud ia ki kyndon bala buh. Kala maham ia ka company ba lada kam lah pynurlong ia ki jingdawa, ka seng kam leit ban buh ia ka jingujor sha ki bor ba halor.
Ka AKHAF kala dawa ruh ia ka CPWD (Roads) Shillong, ba kan tuklar mardor ia kane ka jingkynnoh bamsap bad ba dei ban leheiei noh marmar pyrshah ia ka company.
