Shillong, Jylliew 20: Ka Sorkar Pdeng kala rai ban phah ia ka kynhun Inter-Ministerial Central Team (IMTC) sha Meghalaya bad Assam ban leit shim jingkheiñ ia ki jingpynjulor ki bor ka mariang kaba wan lyngba ka jingshlei um.
Ia kane la pyntip da u Myntri kam Pohiing ka Ri u Amit Shah hynne ka sngi nyngkong.
“Ka kynhun Inter-Ministerial Central Team (IMTC) kan sa leit jurip ia ki jaka ba shlei um ha Assam bad Meghalaya ba kin shim jingkheiñ ia ki jingpynjuor. Hadien ka jingshlei um ha ki bnai bala leit noh, ka kynhun IMTC kala leit jurip ia ki jaka ha Assam naduh ka 26 tarik Jymmang haduh 29 tarik Jymmang 2022” ong u Amit Shah ha ka Twitter.
An Inter-Ministerial Central Team (IMCT) will visit the flood-affected areas of Assam and Meghalaya to assess the damages. After the earlier spell of floods, an IMCT visited the affected areas of Assam from 26 May to 29 May, 2022.
— Amit Shah (@AmitShah) June 20, 2022
U Myntri kam Pohiing ula pyntip ruh b aula dep iakren bad u Myntri Rangbah ka Assam u Himanta Biswa Sarma bad ia u Myntri Rangbah ka Meghalaya Conrad Kongkal Sangma, ban iasyllok halor ki jinglong jingman ha kine ki artylli ki Jylla namar ka jingther u slap bad ka jingshlei um.
“Ka Sorkar u Modi ka don ryngkat bad ki nongshongshnong ka Assam bad ka Meghalaya ha kum kane ka khep ba donkam” ula ong.
Palat 19 ngut ki briew kila iap na ka jingshlei um bad jingtwa khyndew kaba wan jia na ka jingther u slap ha Ri-lum Khasi Jaiñtia bad Rilum Garo ha ka 16 tarik Jylliew bad 17 tarik Jylliew .
Hadien ka jingleit iakynduh ia ki Longiing kiba shah ktah na ka jingtwa khyndew ha Mawsynram Block, u Myntri Rangbah ka Jylla ula pynbna ba ka Sorkar Jylla ban pyllait ia ka song pisa ba T 4 lak sha ki Longiing kiba la duhnoh iala ki jong ki doh ki snam.
